Qol hesabını açan Silvanus Nimeri: “Əsas odur ki, “Sumqayıt” qalib gəlsin”

“Sumqayıt”ın hücumçusu Silvanus Nimeri Futbolxeber.az saytına müsahibə verib.

- “Səbail”ə səfərdə 1:0 hesabı ilə qalib gəldiniz. Qələbəni necə şərh edərdiniz?

- Çox çətin oyun alındı. Yaxşı rəqibə qarşı oynayırdıq. Bütün gücümüzlə mübarizə apardıq. Hər kəs ən yaxşısını meydanda göstərməyə çalışdı. Bu oyun bizim üçün çox vacib idi. Çox şadam ki, qalib gələ bildik. İndi bunun ardını gətirməliyik.

- “Sumqayıt”dakı qol hesabınızı açmaqla komandaya vacib qələbə qazandırdınız...

- Buna görə çox sevinirəm. Nəhayət ki, fərqlənə bildim. Amma mənim, yaxud digərinin fərqlənməsi önəmli deyil. Əsas odur ki, komanda qalib gəlsin.  

- Azarkeşlər bu qolun ardını görə biləcəklər?

- İnşallah. Daha çox çalışmalıyam. Həm də bu, təkcə məndən yox, komandadan asılıdır. Futbol kollektiv oyundur.

- Samir Abasovun gedişi və Vaqif Cavadovun gəlişi “Sumqayıt”da nəyi dəyişib?

- Onların hər ikisi peşəkardır. Samir Abasovun dönəmində komandaya gəlmişəm. O, çox yaxşı mütəxəssisdir. Eyni sözləri Vaqif Cavadov barədə də deyə bilərəm. O, çox pozitiv insandır. Komandada hər kəsi dəstəkləməyə çalışır.

- Qələbə həsrətinin bitməsi ilə “Sumqayıt”ın “qara zolaq”dan çıxdığını söyləmək olar, yoxsa hələ tezdir?

- Çalışacağıq ki, bu qələbənin ardını gətirək. Pozitivik. İndiki məqamda bir qələbəyə çox ehtiyacımız var idi. Şadam ki, buna nail olduq. Bundan sonra qələbənin ardını gətirməliyik.

- Lakin növbəti turda “Sabah”la qarşılaşacağınızı nəzərə alsaq, bu, heç də asan olmayacaq...

- Əlbəttə, “Sabah” yaxşı komandadır. Heyətlərində çox güclü futbolçular var. Amma biz də zəif deyilik. İnamlıyıq. Qələbə qazanmaq və azarkeşlərimizi sevindirmək üçün əlimizdən gələni edəcəyik.

- Azərbaycan Premyer Liqasında bu mövsümdən çıxış edirsiniz. Çempionatın səviyyəsi barədə nə deyə bilərsiniz?

- Səviyyə yüksəkdir. Çox yaxşı komandalar var. Bu, dərhal hiss olunur. Komandaların heyətlərindəki legionerlər də seçilirlər. Olduqca maraqlı, gərgin mübarizə gedir. Mənim üçün bu liqada oynamaq çox xoşdur.

İbrahim Cəfərov