Samir Abasov: “Çox xoşbəxtəm ki, “Neftçi”yə qayıtmışam”

“Hisslərimi ifadə etmək çox çətindir. Elə bil ki, heç burdan getməmişdim. Düzdür, indi komandanın bazası başqadır. Amma ab-hava eyni olaraq qalır”.

Futbolxeber.az saytının məlumatına görə, bu sözləri yenidən “Neftçi”nin baş məşqçi vəzifəsinə qayıdan Samir Abasov deyib.

Klubun televiziyasına danışan təcrübəli mütəxəssis “Neftçi”yə qayıtdığı üçün xoşbəxt olduğunu bildirib: “Böyük komandanın böyük təzyiqi - bu fikirlərlə bura gəlmişdik. Bu da eyni olaraq qalır. Heç getməmiş kimi qayıtmışıq. Qayıdanda da o qədər rahat idi ki... Öz evimizə, öz tanıdığımız yerə qayıdırıq. Mənim vaxtımdan burda qalan insanların xoş münasibət göstərməsi... bütün bunları sözlə ifadə etmək çətindir. Çox xoşbəxtəm ki, bura qayıtmışam”.

S.Abasov hədəflərinin yüksək olduğunu vurğulayıb: “Neftçi”nin böyüklüyündən danışmaq artıqdır. Bunu hamı bilir. Klub necə böyükdürsə, o cür də böyük azarkeşi var. Məşqçi kim olursa olsun, komandanın hədəfləri həmişə böyük olur. Baxmayaraq ki, indi sözün əsl mənasında çətin durumdayıq. Amma bizim hədəflərimiz də, klubun hədəfləri də həmişə yüksək olub. Məşqçilər də klubun hədəfinə uyğun gətirilib. Həmin məşqçilərin uğurlu olub-olmaması artıq başqa mövzudur. Amma biz özümüz də bura gələndə nəyə görə gəldiyimizi bilirik. Görülən işlər də göstərir ki, klubun hədəfinə çatması üçün hər şey edilir. Bütün bunları çox yaxşı anlayırıq. Hədəflərimiz yüksəkdir”.

46 yaşlı məşqçi “Neftçi”də görülən işlərin qarşılığında ən pik hədəflərə çatmağa çalışacaqlarını vurğulayıb: “Məşqçidən asılı olmayaraq klubun hədəfləri hər zaman yüksək olub. Çünki görülən iş bunu tələb edir. Yenilənən bir “Nefyçi”yə gəlmişik. Bugünkü gündə dəyişikliklərdən danışmaq tezdir. 1-2 günə, 2-3 oyun kardinal dəyişikliklər etmək özü bir riskdir. Çünki futbolçular da insandırlar. Onlara da yeni məşqçiyə, yeni ideyalara adaptasiya olmaq üçün vaxt lazımdır. Amma vaxt deyəndə istəyirəm bu da düz yozulsun, dəyişikliklər, əlbəttə, olacaq. İnanıram ki, dəyişikliklər müsbət tərəfə olacaq”.

O, ilk məşqdə gördüklərindən razılığını ifadə edib: “Dünənki birinci məşqdən sonra həddindən artıq yaxşı emosiyalarla getdim. Çünki futbolçularda yüksək əhval ruhiyyə gördüm. İnanıram ki, dediklərimizi də oyunçular tezliklə qavrayacaq və ən yaxşısını meydançada görəcəyik. İşlədiyim yerdən asılı olmayaraq futbolçulardan gözləntilərim həmişə yüksək olub. Qarşıya qoyulan məqsəd nədirsə, mən də buna çatmaqda futbolçulara yardımçı olmağa çalışmışam”.

Sonda Samir Abasov “Neftçi” azarkeşlərinə səslənib: “Neftçi” kimi klubda zamandan danışmaq yersiz olar. Bugünkü məqsədimiz bacardığımız qədər tez bu situasiyadan çıxmaqdır. Böyük klubun böyük azarkeşi olur. “Neftçi”də doğrudan da böyük azarkeş qrupu var. Qrupdan da əlavə, ürəyi “Neftçi” ilə döyünən insanlar var. Mən baş məşqçi kimi yox, futbolçu kimi onlara səslənmək istəyirəm. Bizim çox yaxşı futbolçularımız var. Hansı ki, onlarla danışanda görünür ki, azarkeşlərin dəstəyinə ehtiyacları var. Çox xahiş edirəm, dəstəyinizi onlardan əsirgəməyin. Futbolçulara dəstək olun. Onlar çox yaxşı işlər bacaraqlar”.