II Liqada hakim biabırçılığı

II Liqanın VI turu çərçivəsində keçirilən “Şimal” - “Dinamo” oyununda hakim biabırçılığı yaşanıb.

Futbolxeber.az saytının məlumatına görə, görüşün baş hakimi Mahmud Bağırzadə qərarları ilə matça damğasını vurub.

Belə ki, görüşün əvvəlində meydan sahiblərinin üzvü Pərviz Əsədov paytaxt klubunun hücumçusu Valeh Seyidovu cərimə meydançasının daxilində kobudluqda dayandırsa da, baş hakim bu epizodda kobudluğa göz yumub. O nə “Şimal”ın qapısına penalti təyin edib, nə də P.Əsədovu sarı vərəqə ilə cəzalandırıb. Halbuki epizodu izlədikdə hər şey açıq-aşkar görünür. Cərimə meydançasının daxilində kobudluq penalti deyilsə, bəs nədir? Bəlkə qaydalar dəyişib? 

Lakin bu, matçın gedişində baş hakimin yeganə səhvi olmayıb. 17-ci dəqiqədə hakimin cərimə meydançasındakı kobudluğa göz yummasından ruhlanan “Şimal”ın 27 nömrəsi az sonra rəqib futbolçuya başla zərbə endirsə də, hakim yenə də epizodu görməzdən gəlib. Mahmud Bağırzadənin səhvləri birbaşa oyunun nəticəsinə təsir edib. Çünki layiq olduğu vərəqələri almayan “Şimal”ın futbolçusu Pərviz Əsədov qalan dəqiqələrdə dubl etməklə komandasının qələbəsində böyük pay sahibi olub. Təbii ki, referi vaxtında futbolçuya qırmızı vərəqə göstərsəydi, nəticənin necə olacağını proqnozlaşdırmaq mümkün deyil.

Matçın baş hakimi “Şimal”ın 18 nömrəli üzvü Tural Cəlilovun qeyri-etik davranışlarına da göz yumub ki, bu da matçı izləyənlərin ciddi narazılığına səbəb olub.

Maraqlıdır ki, Mahmud Bağırzadənin “Dinamo” ilə ulduzu hələ ötən ildən barışmır. Belə ki, 2023/24 mövsümünün 25-ci turunda keçirilən “Baku Sportinq” - “Dinamo” görüşündə də (4:2) sözügedən referinin idarəçiliyi narazılıqla qarşılanmışdı. Hətta “Dinamo” rəhbərliyi Mahmud Bağırzadənin idarəçiliyindən narazılığını Hakimlər Komitəsinin o vaxtkı rəhbəri Barış Şimşəkə yazılı şəkildə çatdırmışdı. Lakin göründüyü kimi, dəyişən nəsə yoxdur. Barış Şimşək getdi, Frank de Blekere gəldi, lakin Azərbaycan hakimliyində dəyişən nəsə yoxdur. Necə deyərlər, toplananaların yerini dəyişəndə cəm dəyişmir...

Məsələ ilə bağlı “Dinamo”nun prezidenti Yaşar Seyidovun da fikirlərini öyrəndik. Azərbaycan futbolunda böyük təcrübəyə malik olan Seyidov baş hakimin idarəçiliyindən narazı qaldıqlarını bildirdi: “Artıq hakimliklə bağlı yazılı şəkildə müraciət etmişik. Referinin nəticəyə təsir edən səhvləri oldu. İnanırıq ki, bu dəfə sözgedən referi ilə bağlı ədalətli qərar qəbul olunacaq”.

Futbolxeber.az