“Azərbaycanda heç bir futbolçunun karyerası mənim kimi olmayıb”

“Çox ağır oyun oldu. “Səbail” zəif deyil. Yaxşı da futbol oynayırlar. Xarakter hesabına qələbə qazandıq”.

Futbolxeber.az saytına müsahibəsində bu sözləri “Araz-Naxçıvan”ın kapitanı Vadim Abdullayev Azərbaycan Premyer Liqasının 8-ci turunda “Səbail”i 3:2 hesabı ilə məğlub etdikləri oyun barədə danışarkən deyib.

7 matçdan 16 xal toplayan “Araz-Naxçıvan” hazırda turnir cədvəlində ikinci yeri tutur. Kapitan bildirib ki, bu tempi qorumaq üçün çox çalışmalıdırlar: “Həmişə öndə olmaq üçün çalışmalısan. Biz də turnir cədvəlində ön pillələrdə sona kimi olmaq istəyirik. Təbii ki, bunun üçün əziyyət çəkəcəyik. Nəticə olduqca rəqiblər bizimlə oyuna daha ciddi yanaşırlar. Buna görə də çox işləməliyik”.

V.Abdullayev qeyd edib ki, ilk dövrəni komandasının aktivinə yazmaq olar: “Hazırda 16 xalımız var. 7 oyun keçirmişik. 9 matçdan 22 xal toplaya bilsək, əla olar”.

O, növbəti turda qarşılaşacaqları “Sabah”la görüşdən də söz açıb: “Çətin olacaq. “Sabah” güclü rəqibdir. Heyətlərində çox yaxşı futbolçular var. Lakin onlardan çəkinən deyilik. Çünki biz də yaxşı komandayıq”.

VII turda “Turan Tovuz”la görüş Vadim Abdullayev üçün Azərbaycan Premyer Liqasında 100-cü matç kimi yadda qaldı. “Bakı”nın yetirməsi erkən yaşlarda parlasa da, Premyer Liqadakı yubileyi yalnız 30 yaşında reallaşdı: “Azərbaycanda heç bir futbolçunun karyerası mənim kimi olmayıb. Nələr görmədim, nələr yaşamadım... Mən də istərdim ki, 100 oyun həddinə daha tez çatım. Amma qismət belə imiş... Bəzi şeylər məni xeyli geri saldı. Özümdə də 1-2 səhv oldu. Məni futboldan küsdürdülər... İncimişdim, heç qayıtmaq istəmirdim, futbolun başını buraxmışdım. Zorla qaytardılar. Amma yenə də narazı deyiləm. O boyda həngamədən sonra 100-ə çatmışamsa, bu da pis deyil”.

Fərəc Aslanov