Belajdi Pusi: "Vurduğum qola sevinməməyim "Turan Tovuz"a olan hörmətimdən irəli gəlir"

"Şamaxı"nın hücumçusu Belajdi Pusinin Futbolxeber.az saytına müsahibəsi

- Azərbaycan Premyer Liqasının VIII turunda "Turan Tovuz"a qarşı keçirilən oyun 2:2 hesabı ilə yekunlaşdı. Dramatik sonluqla başa çatan matçı necə şərh edərdiniz?

- İlk hissədə oyun bizim üçün çətin alındı. Çünki "Turan Tovuz" aqressiv oynyıradı. Lakin ikinci hissədə daha yaxşı etdik. Qələbə qazanmağa çalışdıq. Buna çox yaxın idik. Təəssüf ki, sonda qələbəni əldən verdik. Ümumilikdə yaxşı oyun keçirdiyimizi düşünürəm.

- "Şamaxı" bu matçda 1 xal qazandı, yoxsa 2 xal itirdi?

- Oyunun gedişatına uyğun 2 xal itirdiyimizi düşünürəm. Çünki sonda qələbəni əldən verdik. Amma onu da unutmamalıyıq ki, "Turan Tovuz" yaxşı komandadır.

- “Turan Tovuz”un keçmiş klubunuz olduğunu nəzərə alsaq, bu matça xüsusi motivasiya ilə çıxdığınızı düşünmək mümkündür?

- “Turan Tovuz”a böyük hörmətim var. Orada 2 gözəl il keçirmişəm. Lakin hazırda “Şamaxı”nın uğurları üçün çalışıram. Digər oyunlara necə motivasiya olmuşdumsa, bu matça da o cür köklənmişdim. Xüsusi bir şey yox idi.

- Və qol vurmaqla özünüzü sübut etdiniz...

- Hücumçu üçün qol vurmaq normaldır. Vacib olan yaxşı oynamaq, komandama kömək etməkdir.

- Qol vurduqdan sonra sevinməməyinizin səbəbi nə idi?

- Vurduğum qola sevinməməyim "Turan Tovuz"a olan hörmətimdən irəli gəlir. Bu klubun futbolçularına, rəhbərliyinə, azarkeşlərinə böyük hörmətim var.

- Növbəti turda “Səbail”lə qarşılaşacaqsınız. Həmin matçdan gözləntiləriniz nədir?

- İlk növbədə bərpa prosesi keçməli, daha sonra yaxşı çalışmalıyıq. Hər matça olduğu kimi, qarşıdakı görüşə də qələbə üçün çıxacağıq. Əlimizdən gələni edəcəyik ki, uğur qazanaq.

- 7 turdan sonra 12 xalınız var. Halbuki yeni yığılan komandadan çoxları bu nəticəni gözləmirdi. İlk dövrəni “Şamaxı”nın aktivinə yazmaq olar?

- Deməzdim ki, bu nəticə mənim üçün sürpriz oldu. Hələ bu kollektivə qoşularkən inamlı çıxış edəcəyimizə inanırdım. Çünki yaxşı komandamız, yaxşı baş məşqçimiz var. Digərləri üçün bəlkə də sürprizdir. Amma mənim üçün bu, gözlənilən idi. Uğurlu çıxışımızı bundan sonra da davam etdirəcəyimizə inanıram.

İbrahim Cəfərov, Şamaxı