“Zirə”nin kapitanı: “Arxayınçılıqdan söhbət gedə bilməz”

“Ötən tur “Neftçi” üzərində çox vacib qələbə qazanmışdıq. Bu dəfə də “Sumqayıt”a qalib gəldik. Bu qələbə bizim üçün çox vacib idi”.

Futbolxeber.az saytına açıqlamasında bu sözləri “Zirə”nin kapitanı Qismət Alıyev deyib.

Azərbaycan Premyer Liqasının VII turunda “Sumqayıt” üzərində qazanılan qələbəni (2:0) şərh edən 28 yaşlı futbolçu 3 xalı heç də asanlıqla əldə etmədiklərini bildirib: “Bizi çətin oyun gözlədiyini bilirdik. Son turlar xalsız qalmasına baxmayaraq, “Sumqayıt” heç də zəif komanda deyil. Xüsusən də öz meydanında inamlı təsir bağışlayır. Burada hər komanda çətinliklə üzləşir. Biz də qələbə üçün əziyyət çəkdik. Yekunda da çox mühüm 3 xal qazandıq. Artıq irəli baxmalıyıq”.

“Zirə”nin kapitanı növbəti turda “Kəpəz”ə qarşı keçirəcəkləri matçın da asan alınmayacağını bildirib: “Həftə sonu “Kəpəz”lə qarşılaşacağıq. Gəncə klubu ilk 7 oyunun hamısında uduzub. Ona görə də hər növbəti matç onlar üçün ümid yeridir. Bizimlə görüşdə də nə olur-olsun xal qazanmağa çalışacaqlar. Buna görə də bizi çox çətin oyun gözləyir”.

Q.Alıyev “Kəpəz”lə matça yalnız 3 xal üçün çıxacaqlarını söyləyib: “Rəqib hazırda autsayder olsa da,

hər hansı arxayınçılıqdan söhbət gedə bilməz. Matça çox ciddi hazırlaşırıq. Məqsədimiz də 3 xal qazanmaqdır. Lakin bu, heç də asan olmayacaq. Çünki turnir cədvəlində sonuncu olmasına baxmayaraq, “Kəpəz” yaxşı komandadır. Məşqçi dəyişikliyi olub, baxımlı futbol oynamağa çalışırlar”.

Fərəc Aslanov