“Ayın qolu”nun müəllifi: “Başqası olsaydım, mən də Kamranın qoluna səs verərdim”

“Açıq deyim ki, başqası olsaydım, mən də Kamranın qoluna səs verərdim. Çox şadam ki, sorğuda qalib oldum. Mənə səs verən hər kəsə təşəkkürümü bildirirəm”.

Futbolxeber.az saytına açıqlamasında bu sözləri Azərbaycan Premyer Liqasında “Ayın qolu” layihəsi çərçivəsində avqust ayının qalibi olan “Sumqayıt”ın hücumçusu Kamran Quliyev deyib.

Dünən “Sumqayıt” - “Zirə” görüşündən öncə Mehdi Hüseynzadə adına Sumqayıt şəhər stadionunda Peşəkar Futbol Liqasının Texniki-idman direktoru Elgiz Abbasov tərəfindən mükafatlandırılan 24 yaşlı hücumçu qalib olmasına baxmayaraq, çox da sevinə bilmədiyini söyləyib: “Düzdür, sorğuda qalib seçildim. Lakin əsas olan komandamın qələbəsidir. Təəssüf ki, qələbələr də gəlmir. İnşallah, növbəti oyunlardan vəziyyət dəyişər”.

“Düzdür, “Zirə” matçda oynamadın, lakin yenə də matçı izlədin. Məğlubiyyəti nə ilə əlaqələndirmək olar?” sualını “Sumqayıt”ın hücumçusu belə cavablandırıb: “Oynamadın deyəndə ki, onsuz da oynamıram, arada 5-10 dəqiqəlik meydana çıxıram. Onda da komandam üçün əlimdən gələni etməyə çalışıram. Məğlubiyətin səbəbi barədə dəqiq bir söz deyə bilmirəm. İnşallah düzələr”.

O, ardıcıl 4 məğlubiyyətin nə ilə əlaqədar olduğunu bilmədiyini vurğulayıb: “Düzdür, paltardəyişmə otağında futbolçularla aramızda söhbət edirik. Lakin orda olan söhbətlər elə orda da qalır... Nə deyim? Futboda belə hallar olur. “Qara zolaq”dan çıxmaq lazımdır. İnanıram ki, qarşıdakı matçlarda qələbə qazanacağıq”.  

K.Quliyev növbəti matçları nişan versə də, qarşıdakı turda “Sumqayıt” “Neftçi” səfərinə yollanacaq, daha sonra isə “Qarabağ”la üz-üzə gələcək: “Əlbəttə, hər iki matç çox çətindir. İnşallah xeyirlisi. Bilmirəm nə deyim. Ümid edirəm ki, qalib gələrik”.

Fərəc Aslanov