Anatoli Nuriyev: “Keçən il çempionat daha maraqlı idi”

“Sabah”ın yarımmüdafiəçisi Anatoli Nuriyevin Futbolxeber.az saytına müsahibəsi

- Azərbaycan Premyer Liqasının VII turunda “Səbail” üzərində 4:2 hesablı qələbə qazandız. Səfərdə qazanılan 3 xalı necə şərh edərdiniz?

- Çətin oyun oldu. “Səbail”ə qarşı səfərdə oynamaq həmişə çətindir. Qazonun süni olması da öz təsirini göstərir. Bununla belə, vacib qələbə qazandıq. Uğurlu çıxışımızı davam etdirməliyik.

- Düzdür, siz matça ehtiyat oyunçular skamyasından başladınız, amma yenə də fikriniz maraqlıdı. Erkən qol komandada psixoloji baxımdan çətinlik yaratmadı?

- Əslində, ehtiyatda oturanda həmişə çətinlik olur (gülür). Amma komanda erkən qoldan sonra özünü itirmədi, tez toparlandı. Cavab qolunu da erkən vurduq. Daha sonra qolların ardı gəldi. Pis o oldu ki, ilk yarının sonuna yaxın qapımızda ikinci qolu gördük. Bu səbəbdən də fasilədən sonra işimiz bir qədər çətin oldu.

- Bu qələbə sayəsində turnir cədvəlində ikinci pilləyə yüksəldiniz. İlk 7 turu komandanız üçün necə dəyərləndirirsiniz?

- Normal demək olar. Ümumiyyətlə, hazırda oyunlar çətin keçir, çoxlu hava mübarizələri olur, standart vəziyyətlərdən xeyli qollar vurulur. Çox vuruşmaq lazımdır. Ümumi götürəndə ilk 7 turda pis çıxış etmədik. Bu da sevindiricidir.

- Bəs ötən mövsümlə müqayisədə çempionatın səviyyəsində dəyişiklik var?

- Keçən il çempionat daha maraqlı idi. Mövqelər üzrə daha gərgin mübarizə gedirdi. Amma ola bilər ki, mövsümün gedişində vəziyyət dəyişsin. Çünki hələ çempionatın əvvəlidir, cəmi 7 tur oynanılıb. Heç nə həll olunmayıb.

- Növbəti turda “Qarabağ”la qarşılaşacaqsınız. Bu matçdan gözləntiləriniz nədir?

- Maraqlı qarşılaşma olacaq. Qələbəyə oynayacağıq.

- Çempionu məğlub etmək şansınızı real hesab edirsiniz?

- Təbii ki, “Qarabağ”a qalib gəlmək çətindir. Amma bunun üçün əlimizdən gələni edəcəyik.

- Çempionatın ötən il daha maraqlı olduğunu qeyd etdiniz. Bəs əvvəlki mövsümlə müqayisədə “Qqarbağ” daha da güclənib, yoxsa bir qədər zəifləyib?

- Prinsipcə, “Qarabağ” hər il daha güclü görsənir. “Səbail”lə oyunlarına baxmışam. Düzdür, “Qarabağ” 2:1 hesabı ilə qalib gəldi. Amma qol şansları çox yaradırdılar. Bu səbəbdən biz də onlarla görüşdə müdafiədə çox diqqətli olmalıyıq.

İbrahim Cəfərov