Bu Roman o Romandan deyil...

Roman Qriqorçuk “Neftçi”nin baş məşqçisi təyin olunanda çoxları bunu sevinclə qarşıladı. Ukraynalı mütəxəssisin “Qəbələ”də qazandığı uğurlar paytaxt klubunun onun rəhbərliyi altında yaxşı nəticələr əldə edəcəyinə inam yaradırdı. Nəhayət ki, “ağ-qaralar”ın qara gündən ağ günə çıxacağına ümid böyük idi. Üstəlik, rəhbərlik də komandanın uğuru üçün necə deyərlər, kisənin ağzını açmışdı. Baş məşqçinin istədiyi bütün futbolçular heyətə cəlb olundu, yay hazırlığı üçün hər cür lazımi şərait yaradıldı, bir sözlə, Qriqorçukun istəyi hər şey anında və yüksək səviyyədə yerinə yetirildi.

Gəl ki, geridə qalan 6 turda “Neftçi” üçün yaradılan şəraitlə komandanın sərgilədiyi futbol heç cür uyğun gəlmir. Futbolda udmaq da olar, uduzmaq da. Amma məsələ ondadır ki, “Neftçi” geridə qalan müddətdə futbol oynamır. Dünən “Zirə” ilə qarşılaşmada “ağ-qaralar” 90 dəqiqə ərzində nə bir düşünülmüş hücum qura bildi, nə də rəqib qapısı qarşısında real qol epizodu yaratmağa müvəffəq oldu. Qriqorçuk isə hər dəfə vaxt lazım olduğunu deyir. Birinci turdan sonra da, altıncı turdan sonra da ukraynalı mətbuat konfransında aşağı-yuxarı eyni fikirləri səsləndirir. Görünən isə odur ki, bu, bəhanədən başqa bir şey deyil. Necə olur ki, Qriqorçukla aşağı-yuxarı eyni vaxtda işə başlayan Kurban Berdıyevin komandası bu gün çempionatın lideridir, “Neftçi” isə turnir cədvəlində 9-cu pillədə qərarlaşıb. Halbuki “ağ-qaralar” istər heyətinə, istər büdcəsinə, istərsə də şəraitinə görə Tovuz klubunu qabaqlayır. Yaxud sıfırdan yığılan “Şamaxı” bu gün “Neftçi”dən iki dəfə çox xal toplayıb.

Hazırda “Neftçi” lider “Turan Tovuz”dan 10, 1 oyun az keçirmiş “Qarabağ”dan 8 xal geri qalır. Bütün bunlar isə yaxşı heç nə vəd etmir. Bu gedişlə “Neftçi” ötən ilkindən də pis nəticə göstərəcək. Çünki komandanın oyununda ümidverici hər hansı bir işartı yoxdur. Milli komandaların oyunları ilə əlaqədar yaranan fasilənin “Neftçi”yə faydalı olacağı gözlənilirdi. Lakin dünən Zirədəki 90 dəqiqə bu ümidləri də puç etdi. Qriqorçuk isə oyundan sonra bunu etiraf etdi və üzrxahlığını bildirdi. Lakin üzrxahlıqla nə dəyişir ki... “Neftçi” uduzduqca, sizin də bu komandadakı karyeranız sona yaxınlaşır?” sualından isə ukraynalı mütəxəssis konkret yayındı və hər oyundan-oyuna sağlamlığımı itirdiyini söylədi. Birincisi, “Neftçi” rəhbərliyinin nə düşündüyünü deyə bilmərik. Lakin subyektiv fikrimdir ki, “Qarabağ”la oyun Qriqorçuk üçün son şans olmalıdır. Əziyyət çəkib “Qarabağ”ı udsun. Bu halda həm komandanı “qara zolaq”dan çıxarmağa müvəffəq olar, həm də 6 turda verdiyi əziyyətin qarşılığında azarkeşlərin könlünü almış olar. İkincisi də, məgər bu cür biabırçı futbola görə sağlamlığını itirən təkcə Qriqorçukdur? Bəs onda azarkeşlər neyləsinlər? Ukraynalı “sağlamlığını itirməyinin” qarşılığında heç olmasa maaş alır, azarkeşlərə qalan isə əsəb-gərginlikdir.

Dünən Zirə İdman Kompleksində pilləkanları enib konfrans otağına yollanarkən arxadan azarkeşlərin həmkarlardan birinə üz tutaraq dediyi bu sözləri eşidirdim: “Biz deyə bilmirik, heç olmasa siz deyin. Belə olmaz! Qriqorçuk buna futbol deyir? Baş məşqçinin işi bir qram da hiss olunmur, görünmür. Heç .......... “Neftçi”si belə zəif deyildi (Etika xatirinə həmin məşqçinin adını qeyd etmirik - İ.C.)”.

Düz sözə nə deyəsən? Şəxsən mən bu cür aciz “Neftçi” xatırlamıram. Heç belə biabırçı start da yadıma gəlmir. Flaqman 6 oyunda qələbəyə həsrətdi və cəmi 2 qol vura bilib... Qriqorçuk geridə qalan müddətdə yalnız Qara Qarayevi əsas heyətdən kənarda qoyması ilə yadda qalır. Guya ki, geridə qalan 6 turda Rafael Quzzo, Edvin Kuç, Emil Səfərov xarüqələr yaradır...

İbrahim Cəfərov