Ürfan 300-ə çatdı

Urfan Abbasov Azərbaycan çempionatlarında 300-cü oyununu keçirib.

Futbolxeber.az-ın PFL-ə istinadən verdiyi məlumata görə, “Araz-Naxçıvan”ın 31 yaşlı müdafiəçisinin yubileyi Azərbaycan Premyer Liqasının VI turuna təsadüf edib. Abbasov “Kəpəz”lə ev görüşündə (1:0) əvəzolunmadan meydanda olub.

O, ölkə çempionatları tarixinə 300 və daha çox oyun keçirən 28-ci futbolçu kimi düşüb. Premyer Liqada 2011/12 mövsümündə debüt edən müdafiəçi 3 klubun formasını geyinib. O, “Qəbələ”də 248, “Səbail”də 47, “Araz-Naxçıvan”da 5 dəfə şans qazanıb.

Qeyd edək ki, 300 matçda 7 qola imza atan Urfan Qəbələ təmsilçisində 5, paytaxt klubunda 2 dəfə fərqlənib.