İsveç millisinin baş məşqçisi: “Nəticədən razı qaldım"

"Nəticədən razı qaldım. Kifayət qədər şanslarımız oldu. Bunu müdafiədə yaxşı oynayan komandaya qarşı etdik. Açıq oyun təklif etdik. Belə oyun təklif edirsənsə, rəqibə fürsətlər də vermiş olursan. İlk hissədə önə doğru vertikal paslar verirdik, amma arxası gəlmirdi. Fasilədə bununla bağlı danışdıq. Topu itirdikdən sonra komandamız yerini tuta bilmirdi, geri çəkilirdik, rəqibə fürsətlər verirdik. Qapıçının çıxışından çox razıyam, penaltini qaytardı. Ona növbəti oyunlarda da şans verəcəm. Qələbə ilə başladıq. Önəmli olan budur".

Futbolxeber.az saytının məlumatına görə, bu sözləri İsveç millisinin baş məşqçisi Yom-Dal Tomasson UEFA Millətlər Liqasının 1-ci turunda Bakıda Azərbaycan seçməsini 3:1 hesabı ilə məğlub etdikləri oyun barədə danışarkən deyib.

Danimarkalı mütəxəssis komandasının müdafiə xəttindəki çatışmayan cəhətlər haqda da danışıb: "Topu itirəndə yaxşı reaksiya verməliyik. Bunu edə bilmədik. Öndə təzyiq etmək lazım idi. Oyunun müəyyən epizodlarında komanda passiv çıxış etdik. Hücumda mükəmməl deyildik, yaxşı idik, 11 epizodumuz var idi. Bəzi son mərhələyə gəlib çıxmayan epizodlar da oldu. Penaltidən qol buraxsaydıq da, qollar vuracaqdıq. Çünki kifayət qədər qol epizodları yaradırdıq".

O,"Daha əvvəl Bakıda İsveçi 3:0 hesabı ilə məğlub edən Azərbaycan millisi ilə bugün uduzan kollektiv arasında hansı fərqlər var?" sualını belə cavablandırıb: "Az-çox eyni oyunçular əsas heyətdə yer alırdı. Qapıçınız fərqli idi. Bu futbolçular birlikdə oynayırlar. Azərbaycana qarşı rəqib meydanında oynamaq çox çətindir. Ona görə də deyirəm ki, performansımızdan razı qaldım".