Kuzmanoviç: “Sumqayıt”a vurduğum qolu atama həsr edirəm”

“Çətin oyun oldu. Əvvəlki turda “Neftçi” ilə görüşdə son dəqiqələrdə 2 xal itirmişdik. Buna görə də “Sumqayıt”la matçda məqsədimiz yalnız qələbə idi. Bunun üçün əlimizdən gələni etdik. Yaxşı oynadıq. Yaxaladığımız şansdan yararlandıq və qələbə qazandıq”.

Futbolxeber.az saytına müsahibəsində bu sözləri “Araz-Naxçıvan”ın yarımmüdafiəçisi Miço Kuzmanoviç Azərbaycan Premyer Liqasının V turunda “Sumqayıt”ı 1:0 hesabı ilə məğlub etdikləri oyun barədə danışarkən deyib.

Vurduğu yeganə qolla komandasına qələbə qazandıran Bosniya və Herseqovinadan olan futbolçu növbəti matçlarda da fərqlənmək üçün əlindən gələni edəcəyini bildirib: “Bu, mənim cari mövsümdə ilk qolumdur. Qələbədə pay sahibi olduğum üçün çox şadam. Qollarıma davam etmək istəyirəm. Məşqlərdə tam gücümlə çalışıram. Həm özüm, həm də komandam üçün daha çox qol vurmaq istəyirəm. Bu qolu atama həsr edirəm”.

28 yaşlı yarımmüdafiəçi komandasının çempionatın startındakı çıxışını belə dəyərləndirib: “Bir oyunumuz təxirə düşüb. 4 matçda 7 xal toplamışıq. Düşünürəm ki, bu, yaxşı nəticədir. Üstəlik, nəzərə almaq lazımdır ki, ötən mövsümün sonunu heç də yaxşı keçirməmişdik. Lakin cari çempionata uğurlu start vermişik. İnanıram ki, belə də davam edəcəyik”.

M.Kuzmanoviç çempionatda yaranan fasilədən lazımınca yararlanacaqlarını vurğulayıb: “Düzdür, hazırda komandamız yaxşı formadadır. Amma düşünmürəm ki, bu fasilə müddəti ziyanımıza işləsin. Əksinə, daha çox çalışacağıq. 2 həftə ərzində qarşıdakı matçlara çox ciddi hazırlaşacağıq”.

Fərəc Aslanov