AFFA-dan Baxşıyevə sərt cəza

AFFA İntizam Komitəsinin iclası keçirilib.

Futbolxeber.az saytının məlumatına görə, 24 avqust 2024-cü il tarixində Azərbaycan Premyer Liqasının IV turunun “Araz-Naxçıvan” - “Neftçi” oyununda meydan sahiblərinin 4 futbolçusu sarı vərəqə aldığına görə Naxçıvan klubu 700 manat cərimə edilib.

Oyunun 90+5-ci dəqiqəsində “Araz-Naxçıvan” klubunun baş məşqçisi Elmar Baxşıyev rəqibi təhqir etdiyinə görə birbaşa qırmızı vərəqə aldığı üçün 3 oyun şərti olmaqla 5 oyun cəzalanıb, “Araz-Naxçıvan” komandası 4000 manat cərimə edilib. Sınaq müddəti 3 ay təyin olunub.

Matçın 90+5-ci dəqiqəsində “Araz-Naxçıvan” klubunun inzibatçısı Hüseynxəlil Orucoğlu rəqibi təhqir etdiyinə görə birbaşa qırmızı vərəqə aldıqdan sonra rəqib futbolçuya fiziki təzyiq göstərməyə cəhd etdiyinə görə 2 oyun şərti olmaqla 5 oyun cəzalanıb, Naxçıvan təmsilçisi 4000 manat cərimə edilib.

Görüş zamanı “Neftçi”nin 6 futbolçusu sarı vərəqə aldığına görə klub 700 manat cərimə olunub.

Qarşılaşmanın gedişində “Neftçi” klubunun azarkeşləri tərəfindən rəqib futbolçuların ünvanına kütləvi şəkildə təhqiramiz ifadələr səsləndirildiyinə və bu hal cari mövsümdə ilk dəfə yaşandığına görə kluba xəbərdarlıq edilib.