Qriqorçuk: “Transferlərimiz bitməyib”

“Neftçi” Azərbaycan Premyer Liqasının üçüncü turunda “Sabah”a 0:2 hesabı ilə uduzub.

Futbolxeber.az saytının məlumatına görə, oyundan sonra təşkil edilən mətbuat konfransında “ağ-qaralar”ın baş məşqçisi Roman Qriqorçuk jurnalistlərin suallarını cavablandırıb:

- Siz bura gələndə çoxları düşünürdü ki, "Neftçi" "Qarabağ"la çempionluq mübarizəsi aparacaq. Amma 3 turdan sonra komandanın nəticələri və oyunu ümidverici deyil. Bu durumu necə şərh edərdiniz?

- Haqlısınız. Bu gün məğlub olduq, istədiyimiz kimi oynamırıq. Hər şey neqativ görünür. 3 tur ərzində azarkeşlərimizə qələbə bəxş edə bilməmişik.

- Mətbuatda klub rəhbərliyi ilə aranızda fikir ayrılığı yarandığı barədə xəbərlər yayılıb. Bu, nə dərəcədə doğrudur?

- Mətbuatda bu cür söz-söhbətlərin olduğunu indi öyrəndim. Bu məsələni ümumiyyətlə şərh edə bilmərəm. Bu həftə ərzində rəhbərliklə danışığımız belə olmayıb.

- Yeni transferlərin çıxışından razısınız?

- Yeni futbolçuların gəlməsi sevindiricidir. Biz bunun üzərində çalışırıq. Hələ transferlərimiz bitməyib, yeni oyunçular gələcək. Hər futbolçunun performansını mühakimə etmək üçün ən azı 5-6 tur lazımdır. Bəzi oyunçular obyektiv səbəbdən tam hazır deyillər. Son oyunlarını may ayında keçiriblər. Yavaş-yavaş komandaya uyğunlaşmağa cəhd göstərirlər.

- Transferlər sırf sizin seçiminiz əsasında edilir? Yoxsa siz istədiyiniz mövqeləri deyirsiniz və ona uyğun futbolçu tapılır?

- Mənə oyunçuların siyahısı verilir. Onlara baxıb seçimlər edirik. İstisna hal kimi Andrey Ştoqrini qeyd edərdim. Mənim əvvəlki komandamda çıxış edib. Sırf mənim təqdimatım əsasında "Neftçi"yə gəlib.

- "Qəbələ"yə yeni gəldiyiniz vaxtda tanıdığınız futbolçuları – Antonov, Qay, Bezotosnı, Zenyov, Sivakov və digərlərini komandaya dəvət etmişdiniz. Amma eyni halı "Neftçi"də görmürük, qeyd etdiyiniz kimi, yalnız Ştoqrini gətirmisiniz. Bu, nə ilə bağlıdır?

- Səmimi desəm, heç Ştoqrini də gətirmək istəməzdim. Amma artıq bu baş verib. Klubda bir sistem var, oyunçuları izləyirlər, təhlil edirlər. Məşqçi də bunun əsasında seçim edir. Sivil yoldur, buna da hörmətlə yanaşıram. Antonovu "Qəbələ"yə gətirəndə şayiələr yayılmışdı ki, guya mənim yaxın qohumumdur.

- Qara Qarayevi əvəzedici heyətə göndərməyinizin səbəbi nədir? Həqiqətənmi o, bu gün “Neftçi”yə kömək edə biləcək gücdə deyil? Əgər o, sizə lazım deyildisə, bunu daha tez, mövsüm başlamamış futbolçuya deyə bilməzdiniz? Çünki indi demək olar ki, bütün klublar heyətini komplektləşdirib...

- Qara həm yaxşı insandır, həm yaxşı futbolçudur. Uzun illər Azərbaycan milli komandasının şərəfini qoruyub, Azərbaycanın ən böyük klublarından birində çıxış edib. Onunla səmimi söhbət etmişəm, Qaraya demişəm ki, onu hazırda əsas heyət oyunçusu kimi görmürəm. Əvəzedici heyətdə olması klubla futbolçu arasında olan məsələdir. Mən bu haqda şərh verə bilmərəm.

- Transferlərə baxanda belə görünür ki, sizə verilən siyahıdan pisin yaxşısını seçmək məcburiyyətində qalmısız. Bu duruma nə qədər müddət tab gətirə biləcəksiz?

- Çalışdığım hər futbolçunu çox istəyirəm, hamısına hörmətlə yanaşıram. İstəyirəm onların yaddaşında yaxşı qalım.