Səbuhi Səfiyarlı: “I Liqada 4-5 komanda çempionluq uğrunda mübarizə aparacaq”

“Bu mövsüm I Liqa keçənilkindən  daha maraqlı olacaq. Çünki komandalar heyətlərinə yaxşı futbolçular cəlb edirlər. Xüsusən də Premyer Liqa təcrübəsi olanları”.

Futbolxeber.az saytına müsahibəsində bu sözləri “Qəbələ”nin idman direktoru Səbuhi Səfiyarlı deyib.

O, I Liqada “Qəbələ” ilə yanaşı, 3-4 klubun da çempionluq uğrunda mübarizə aparacağını söyləyib: “Bəli, “Qəbələ” çempionluğa oynayacaq. Aydın məsələdir ki, dərhal Premyer Liqaya qayıtmaq istəyirik. Lakin digər rəqiblər də mövsümə ciddi hazırlaşırlar. Deyərdim ki, tək “Qəbələ” yox, ümumilikdə 4-5 komanda çempionluq uğrunda mübarizə aparacaq. Klubların büdcələri, edilən transferlər belə deməyə əsas verir. Bizi qarşıda çox gərgin mövsüm gözləyir”.

“Qəbələ” rəsmisi I Liqadakı çatışmazlıqlar barədə də danışıb: “Yeganə narahatlıq doğuran məsələ infrastrukturdur. Çünki bəzi meydançaların durumu heç də yaxşı deyil. Söhbət heç futbol oynamaqdan da getmir. Məsələ futbolçuların sağlamlığıdır. Qalan xırda məqamlar idarə oluna biləcək səviyyədədir”.

Heyətlə bağlı danışan S.Səfiyarlı “Qəbələ”nin yetirmələri ilə yanaşı, legionerlərə də üstünlük verəcəyini vurğulayıb: “İlk növbədə akademiyamızın uşaqlarına üstünlük verməyə çalışacağıq. Çünki əvvəlki mövsümlərdə bəziləri Premyer Liqada forma geymək şansı qazanmırdılar. Belədə onlardan ya əvəzedici heyətdə faydalanırdıq, ya da icarəyə verirdik. Lakin indi həmin futbolçular I Liqada özlərini göstərmək şansı qazanacaqlar. Heyətə legionerlər də cəlb edəcəyik. I Liqada tələblər fərqlidir. Matçın iştirak ərizəsində 7, meydanda isə 3 əcnəbi yer ala bilər. Ona görə də legioner seçimində dəqiq olmaq lazımdır”.

Fərəc Aslanov