Adil Şükürov: "Transferlərə ehtiyacımız var"

“Yeni komanda qururuq. Buna görə də bizimə vaxt lazım olacaq. Lakin vaxtımız yoxdur. Hər şeyi daha sürətli etməliyik. Qarşıda bizi uzun marafon gözləyir. İnanıram ki, komanda daha baxımlı futbol oynayacaq”.

Futbolxeber.az saytının məlumatına görə, bu sözləri “Kəpəz”in baş məşqçisi Adil Şükürov Azərbaycan Premyer Liqasının ilk turunda “Sumqayıt”a 0:2 hesabı ilə uduzduqları oyundan sonra deyib.

O bildirib ki, komandasının hədəfi Premyer Liqadakı yerini qorumaqdır: “Bizi ən çox narahat edən odur ki, yenidən komanda formalaşdırırıq. Rəqiblər isə formalaşmış komandanı gücləndirir. Futbolçuların çempionata uyğunlaşması bir az vaxt alır. Təəssüflər olsun ki, bu il də hədəfimiz Premyer Liqada qalmaqdır”.

Təcrübəli mütəxəssis transfer çalışmalarından da söz açıb: “Danışıq apardığımız futbolçular var. Transferlərə ehtiyacımız var. Rəhbərliklə bu barədə danışmışıq”.