Miço Kuzmanoviç: “Qarabağ”a öz səhvlərimizdən uduzduq”

“Mövsümün ilk oyunu idi. Yenilənmiş heyətlə meydana çıxmışdıq. Üstəlik, rəqibin də güclü olması işimizi daha da çətinləşdirdi. Bütün bunlar yekunda məğlubiyyətimizə gətirib çıxardı”.

Futbolxeber.az saytına müsahibəsində bu sözləri “Araz-Naxçıvan”ın yarımmüdafiəçisi Miço Kuzmanoviç “Qarabağ”a 1:4 hesabı ilə uduzduqları Azərbaycan Premyer Liqasının açılış matçı barədə danışarkən deyib.

O, öz səhvlərindən uduzduqlarını bildirib: “Matçın əvvəlindəki bir səhv hər şeyi dəyişdi. Təbii ki, “Qarabağ” güclüdür. Amma diqqətsizlik, buraxılan səhvlər ümumi nəticəyə təsir etdi. Yəni ki, öz səhvlərimizdən uduzduq”.

Bosniyalı futbolçu “Araz-Naxçıvın”ın bir qədər zamana ehtiyac duyduğunu vurğulayıb: “Bilirsiniz ki, yay fasiləsində heyətdə ciddi dəyişikliklər oldu. Futbolçuların bir-birinə uyğunlaşması üçün, anlaşmanın yüksək səviyyədə olması üçün bir qədər zaman lazımdır. Ümumilikdə yaxşı heyətimiz var. Düşünürəm ki, qarşıdakı matçlarda daha inamlı təsir bağışlayacağıq”.

Kuzmanoviç növbəti turda qarşılaşacaqları “Şamaxı” haqda məlumatsız olduğunu söyləyib: “Artıq bu matçı unutmalı, qarşıdakı oyun barədə düşünməliyik. Növbəti turda “Şamaxı” ilə üz-üzə gələcəyik. Bu rəqib haqda məlumatsızam. Çünki onlar ötən il I Liqada çıxış ediblər. Amma məşqçilərimiz lazımi məlumatları verəcəklər. İstənilən halda mütləq qələbə qazanmalıyıq”.

Fərəc Aslanov