"Makkabi"nin baş məşqçisi: "Bizə dərs olsun"

"Makkabi"nin (Hayfa) baş məşqçisi Barak Bahar Konfrans Liqasının 2-ci təsnifat mərhələsində "Sabah"a uduzduqları ilk oyunu şərh edib.

 

Futbolxeber.az saytının məlumatına görə, matçdan sonra keçirilən mətbuat konfransında 44 yaşlı mütəxəssis deyib ki, ilk görüşdə 0:3 hesablı məğlubiyyət yaxşı hal deyil. 

 

"Biz hücumda kifayət qədər cəsarətli və kəskin deyildik. Biz yaxşı oynamadıq. Bu məğlubiyyət bizə dərs olmalı və gələn həftə daha yaxşı oynamalıyıq" - deyə B.Bahar bildirib.

 

O, daha sonra deyib: "Əgər sən 0:3 hesabı ilə uduzursansa, deməli, hər şey qaydasında deyil. Düzdür, mövsümün əvvəlidir. Amma bu gün çox uğursuz olduq. Düşündük ki, Dia və Kinda oyunumuza dinamizm qatacaq. Amma daha iki qol buraxdıq. Biz ümumiyətlə, heç oyuna girə bilmədik. Nə etdiksə, bir işə yaramadı".

 

"Makkabi"nin baş məşqçisi "Sabah" barədə də fikirlərini bildirib: "Biz bilirdik ki, rəqibimiz yaxşı komandadır, yaxşı oyunçuları var və bizə asan olmayacaq. Məlum məsələdir ki, heyətimizə daha çox oyuncu cəlb edilməlidir və biz güclənməliyik. Amma bu, bəhanə deyil. 3:0 hesabı ilə uduzmaq olmazdı, bunu bilirik. Nə olursa olsun, fərqi yoxdur. İndi reallığa baxmalıyıq. Hər şeyin mümkün olduğuna inanmalıyıq”.

 

Baş məşqçi qeyd edib ki, komandası keyfiyyətli oyun göstərə bilməyib: "Dəyişikliklər də nəticə vermədi və bu müddətdə iki qol buraxdıq. Biz rəqibin təhlükəli olduğunu bilirdik və onların qarşısını ala bilmədik. Cavab oyununa qədər gücümüzü toparlamağa çalışacağıq. Baxmayaraq ki, bu, çox çətin olacaq. Amma mən komandama inanıram. İkinci oyundan sonra vəziyyəti dəyişə bilərik”.

 

Xatırladaq ki, "Sabah"la "Makkabi" arasında cavab oyunu avsustun 1-i Bakıda keçiriləcək.