Kristian Avram: “Bir nəfər ortaya çıxdı və transferimə mane oldu”

“Araz-Naxçıvan”ın qapıçısı Kristian Avramın Futbolxeber.az saytına müsahibəsi

- İstirahət necə keçir? Gərgin mövsümün yorğunluğunu üzərinizdən ata bilmisiz?

- Hər şey qaydasındadır. Moldova millisinin düşərgəsində olduğum üçün istirahətə bir qədər gec başladım. Ailəmin ətrafında dincəlirəm. Gücümü bərpa edirəm. Artıq bir neçə gündən sonra məşqlərə başlayacağıq.

- “Araz-Naxçıvan”la müqaviləni yenilədiniz. Başqa təklif var idi? Seçimdə həlledici amil nə oldu?

- Bir neçə təklif var idi. Digər çempionatlardan da, eləcə də Azərbaycanın başqa bir klubundan da. Həmçinin “Araz-Naxçıvan” da məni heyətində saxlamaq istəyirdi. Rəhbərlik yeni müqavilə təklif etdi. Biz də sözləşməni uzatmaq qərarına gəldik və bu durumdan məmnunam.

- Komandanı bir çox futbolçu tərk edib. Bu, “Araz-Naxçıvan”ın çıxışına nə dərəcədə təsir edəcək?

- Bəli, bilirəm ki, bir neçə futbolçu klubla müqaviləsini yeniləməyib. Vacib məqam odur ki, yeni oyunçular gəlib. Bildiyim qədər güclənmə davam edəcək. İnanıram ki, güclü, keyfiyyətli transferlər reallaşacaq. Yüksək hədəflər uğrunda mübarizə apara biləcək heyət formalaşdırılır.

- Yeni mövsüm üçün hədəflər nə olacaq?

- Hələlik istirahətdəyik. Lakin bilirəm ki, qarşımıza ciddi hədəflər qoyulacaq. Komanda hər oyunda qələbə qazanmaq üçün, hər xal üçün vuruşacaq. Hazırlıqlara başlayandan sonra nə tələb olunduğunu dəqiq biləcəyik. Əminəm ki, rəqabətə dəvamlı komandamız olacaq.

- Yəqin xəbəriniz var, “Zirə” Avroliqada “Şerif”lə qarşılaşacaq. Hər iki komandanı yaxşı tanıyırsınız. Şansları necə dəyərləndirirsiniz?

- Əlbəttə, püşkün nəticəsindən xəbərim var. Düşünürəm ki, “Zirə” ilə mübarizədə “Şerif” favoritdir.

“Şerif” hər il avrokuboklarda oynayır. Üstəlik, onlar mütəmadi olaraq avrokubokların qrup mərhələsində də mübarizə aparırlar. Bizi 2 maraqlı oyun gözləyir. Böyük həvəslə mən özüm də bu matçlara tamaşa edəcəyəm. Maraqlı mübarizə gedəcək. “Zirə” üçün bu, yaxşı təcrübə olacaq. Qoy güclü qalib gəlsin.

- Maraqlıdır ki, Moldova millisinə dəvət alırsınız, vətəndə bir neçə klubda oynasanız da, “Şerif”lə yollarınız heç vaxt kəsişməyib...

- 2 il qabaq belə ehtimal var idi. Rəsmi təklif də almışdım. Danışıqlar aparmışdıq. Sonradan bir nəfər ortaya çıxdı və transferimə mane oldu. Təəssüflənmirəm. Nə olubsa, olub. Həmin hadisədən sonra mən inkişaf etməyə davam etdim. Düşünürəm ki, karyeramda çox şeyə nail olmuşam və bu, ən vacibidir.

- Avro-2024-ün oyunlarını izləyirsiniz? Favoritləriniz hansı komandalardır?

- Oyunları izləyirəm. Ancaq istirahətdə olduğum üçün futbola çox vaxt ayırmıram. Aşkar favoritim yoxdur. Daha çox gözəl oyundan zövq almağa çalışıram.

Fərəc ASLANOV