50 illik yubileyin mübarək, dostum!

Bu gün Elnur Əşrəfoğlunun 50 yaşı tamam olur. Mərhum həmkarımız əsri yarılayır. Amma təəssüflər olsun ki, doğmaları, əzizləri, dostları artıq 3-cü ildir ki, ad gününü onsuz keçirir. Etibarsız ömür Elnura sadəcə 47 il yaşamaq şansı verdi...

Həyatda olsaydı, indi Almaniyadaydı, Avropa çempionatında. Bəlkə də bugün ona ünvanlanacaq təbriklərdə “Elnur, dünənki şərhin möhtəşəm idi” cümləsi də yer alacaqdı. Qismət... İTV-nin şərhçi seçimini bəyənməsəm də, Avro-2020-də Elnuru yenidən futbol dili ilə desək, “yaşıl meydanlara” qaytardığı üçün bu kanala bir ömür minnətdaram. Çünki Bakıda keçirilən Avropa çempionatında Elnur Əşrəfoğlunun səsini eşitməmək günah olardı... Həm də bu, onun səsini eşitdiyimiz son böyük turnir oldu...

Mənim kimi yüzlərlə, bəlkə də minlərlə gənc idman jurnalisti olmağı məhz Elnurun sayəsində arzulayıb. Onun ecazkar səsi, biri-birindən maraqlı reportajları futbolla yanaşı, idman jurnalistikasını da bizlərə sevdirib. Allahın xoşbəxt bəndəsiyəm ki, - sonradan Elnurun aparıcısı olduğu verilişlərdə qonaq olmaq, onunla birgə səfərlərə çıxmaq, uzun illər çiyin-çiyinə eyni komandada futbol oynamaq, kuboklar qaldırmaq, medallar qazanmaq - bütün bunları yaşamışam. Elnur əla jurnalist, əla futbolçu olduğu kimi, əla da dost idi. O qədər böyük ürəyə sahib idi ki...

Təəssüf ki, ömür kimi, insanlar da vəfasızdı. Bu gün Elnuru kim xatırlayır? Doğmaları, əzizləri, qardaşı Rəşad, ən yaxın dostları vəssəlam. Halbuki Elnur bu gün həyatda olsaydı, yüzlərlə, minlərlə təbrik alacaqdı... Təəssüf ki, həyat belədir. Bu dünyadan köçdünsə, xatırlayanın da azalır. Amma əsl dostları Elnuru heç vaxt unutmayacaq. Onunla keçən xoş günlər hər zaman xatirələrdə yaşayacaq. Elnurun özü kimi. 50 yaşın mübarək, dostum! Xatirən hər zaman qəlbimizdədir!