Yeqor Xvalko: “Kəpəz"in heyəti yenə də sıfırdan yığılsa...”

Son mövsümdə “Kəpəz”in kapitanı olmuş Yeqor Xvalkonun Futbolxeber.az saytına müsahibəsi

- İstirahətiniz necə keçir, mövsümün yorğunluğunu üzərinizdən ata bilirsiniz?

- Hər şey əladır. Belarusiyada, evimdə dincəlirəm. Mövsümün başa çatmasından iki həftə keçib. Demək olar ki, artıq bərpa olunmuşam. Bəzən dostlarla futbol da oynayıram. Çünki yavaş-yavaş hərəkət etmək lazımdır. 

- Gələcək karyeranızla bağlı nə yenilik var? Sizi yeni mövsümdə də “Kəpəz”də görə biləcəyik?

- İndi bu barədə çox danışmaq istəmirəm. Tezliklə bu haqda məlumat alacaqsınız.

- Bir ara adınız “Səbail”lə hallanırdı. Təklif, aranızda danışıqlar olub?

- Mən şəxsən heç kimlə danışmamışam. Amma onlar menecerimlə əlaqə qurmuşdular.

- Danışıqlar necə yekunlaşdı?

- Yalnız onu deyə bilərəm ki, müəyyən müzakirələr aparılıb. Təəssüf ki, bundan artıq məlumat verə bilməyəcəm. Məsələlər dəqiqləşən kimi bu barədə xəbəriniz olacaq.

- Bəs “Kəpəz”in gələcəyi barədə nə deyilir? Rəhbərlik, baş məşqçi ilə əlaqə saxlayırsınız?

- Belarusa qayıtdıqdan sonra mən heç kimlə danışmamışam. Klubla bütün danışıqları menecerim aparır. Bütün lazımi məlumatları mənə o çatdırır. Təbii ki, özüm də mətbuat vasitəsi ilə müəyyən informasiyalar əldə etməyə çalışıram.

- Gedişat onu göstərir ki, “Kəpəz” yeni mövsümdə də sponsorsuz olacaq və ümid yalnız dövlətin ayırdığı 3 milyonadır. Bu halda yenə Premyer Liqada qalmaq uğrunda mübarizə aparmaq çətin olmayacaq?

- Bu halda 100 faiz çətin olacaq. Amma düşünürəm ki, çox şey rəhbərlik və baş məşqçidən, onların hansı heyət yığacaqlarından asılıdır. Eləcə də komandada qalmasını istədikləri futbolçuları saxlaya bilib-bilməyəcəkləri önəmli rol oynayacaq. Təbii ki, heyət yenə də sıfırdan yığılsa, komandanın ötənilki nəticəni təkrarlaması üçün çox vaxt lazım gələcək.

Fərəc ASLANOV