Aydın Bayramov: “Qarabağ”a 3 qol vurub, yekunda uduzmaq adama çox pis təsir edir”

“Belə oyundan sonra danışmaq bir az çətin olur. 1 xal da bizim üçün çox önəmli idi. Çünki “Səbail”lə xal fərqini bir qədər də artırmaq istəyirdik”.

Futbolxeber.az saytına müsahibəsində bu sözləri “Turan Tovuz”un qapıçısı Aydın Bayramov Aydın Bayramov Premyer Liqasının 35-ci turunda “Qarabağ”a 3:4 hesabı ilə uduzduqları oyundan sonra deyib.

O, məğlubiyyətə konkret səbəb gətirməkdə çətinlik çəkib: “Oyunu analiz etmək lazımdır. İndi dəqiq bir söz söyləməkdə çətinlik çəkirəm. Bəlkə də axırıncı qolda hakim səhvi var idi, bəlkə də yox idi. Epizoda diqqətlə baxmaq lazımdır. Ola bilər konsentrasiya çatmadı. Yaxud sona qədər mübarizə aparmadıq”.

A.Bayramov “Qarabağ”ın meydana bəzi aparıcı futbolçuları olmadan çıxması fikrinə belə münasibət bildirib: “Qarabağ”da birinci-ikinci heyət anlayışı yoxdur. Xüsusən də Azərbaycan çempionatında. Hücum xəttində yer alan dördlüyə baxsanız, görəcəksiniz ki, bizə qarşı oynayan əsas heyət idi. Onlara qarşı oynamaq hər zaman çətindir. Düzdür, “Qarabağ”a 3 qol vurmaq da çətindir. 3 qol vurub, yekunda uduzmaq adama çox pis təsir edir”.

“Turan Tovuz”un qolkiperi cari mövsümü komandası üçün belə dəyərləndirib: “Turan Tovuz”un potensialı göz qabağındadır. Bu il çox mənasız xallar itirdik. Bəlkə də bu məqam daha da irəli getməyimizə mane oldu. Qarşımıza avrokuboklara vəsiqə qazanmaq məqsədi qoyulmasa da, sona qədər bunun üçün mübarizə apardıq”.

28 yaşlı qolkiper hələlik gələcək karyerası barədə hər hansı qərar qəbul etmədiyini vurğulayıb: “Növbəti mövsüm üçün dəqiq söz deməkdə çətinlik çəkirəm. Çünki müqaviləm mövsümün sonunda başa çatır. “Kəpəz”lə matçdan sonra baş məşqçi ilə, rəhbərliklə söhbət edəcəyik”.    

Fərəc ASLANOV