Ehtiram Quliyev: “Fərqli fikirlərə ehtiyacımız var, yetər ki, qərəzli olmasın”

“Hər zaman demişəm, azarkeşlər haqlıdırlar. Fərqli fikirlərin olması normaldır. Klub olaraq böyüməyimiz üçün bunlara ehtiyacımız var. Fərqli fikirlərə, fərqli düşüncələrə. Yetər ki, qərəzli olmasın. Qərəzli olmadığı müddətdə hər bir kəsin fikrinə hörmətlə yanaşırıq”.

Futbolxeber.az saytına açıqlamasında bu sözləri “Turan Tovuz”un İdarə Heyətinin sədri Ehtiram Quliyev deyib.

O, yeni mövsüm üçün daha yaxşı kollektiv quracaqlarını bildirib: “Azarkeşlərimiz səbirli olsunlar. Gələn mövsüm üçün gözəl bir komanda quracağıq. Builki nəticəmizdən daha yaxşı nəticəmiz olacaq. Lakin mən nəticə deyəndə turnir cədvəlindəki yerimizə yox, əsasən topladığımız xallara baxıram. Ötən il 39 xal yığmışdıq, bu mövsüm artıq 45 xalımız var. İnşallah ardı gələr, çünki mövsümün sonuna kimi qarşıda daha iki oyumumuz var”.

Klub rəhbəri qeyd edib ki, büdcə imkan verdikcə, bütün planlarını həyata keçirməyə davam edəcəklər: “İldən ilə böyüməyi düşünürük. Hər şey gözəl olacaq. İnfrastruktur, akademiya baxımından da işlərimiz davam edəcək. Büdcəmiz imkan verdiyi müddətdə bütün məsələləri həll etməyə çalışırıq”.

Fərəc ASLANOV