Andre Şinyaşiki: “Hər zaman fərqlənməyi xüsusi bir şey hesab etmirəm”

“Neftçi”nin hücumçusu Andre Şinyaşikinin Futbolxeber.az saytına müsahibəsi

- “Kəpəz” üzərində qazanılan 5:1 hesablı qələbəni necə şərh edərdiniz?

- Bizim üçün “Kəpəz”lə matç çox önəmli idi. Sona 3 tur qalıb. Hər matçda qələbəyə ehtiyacımız var. Vacib görüşdə 3 xal qazanmaq sevindiricidir.

- Het-trik etməklə “Neftçi”nin qələbəsində böyük pay sahibi oldunuz...

- Əlbəttə, 3 qol vurmaq, komandanın qələbəsində pay sahibi olmaq həmişə müsbət amildir. Burdayamsa, bacardığım qədər “Neftçi”yə dəstək olmalıyam.

- Het-trik edəcəyinizi gözləyirdiniz?

- Heç bir fikrim yoxdur. Qətiyyən oyundan öncə qarşıma belə bir məqsəd qoymuram. Mən matçın əvvəllərində meydandakı çıxışımdan o qədər də razı qalmadım. Amma sonra özümə gəlib "Neftçi" üçün vacib olan 3 qol vurub qələbədə pay sahibi oldum.

- Geridə qalan müddətdə xeyli tənqid olunmusunuz. Necə düşünürsünüz, “Kəpəz”lə matçdakı het-trikdən sonra bu tənqidlərə son qoyulacaq?

- Bilmirəm, bu barədə nəsə demək mənim üçün çətindir. Hər zaman fərqlənməyi xüsusi bir şey hesab etmirəm. Əsas olan oyunu yüksək notda başa vurmaqdır. Həmişə yaxşı çıxış etmək mümkün olmur. “Kəpəz”lə görüşdə həm yaxşı çıxış etdim, həm də 3 qol vurdum. Bu məqamda mühakimə etmək bir qədər çətin olur.

- “Neftçi”də maaşların gecikməsi oyunlara köklənməyinizə nə dərəcədə təsir edir? Bildiyimizə görə, mart ayının məvacibini mayın 8-də almısınız...

- Maaş və bu kimi şeylər barədə danışmağı xoşlamıram. Bu, mənim işim deyil. Bu sualın "Neftçi" rəhbərliyi tərəfindən cavablandırılması daha məqsədəuyğundur.

- Növbəti turda "Səbail"in qonağı olacaqsınız. Həmin qarşılaşmanı avrokuboklara vəsiqə uğrunda gedən yolda necə qiymətləndirirsiniz?

- Komandamdan yüksək çıxış gözləyirəm. Təəssüf ki, cəzalı duruma düşdüyüm üçün həmin qarşılaşmada iştirak edə bilməyəcəm. Hədəfimiz qələbədir. Qalib gəlməliyik ki, liqanın son turunda "Sabah"a qarşı matça daha inamlı çıxaq.

Azad NURİYEV