Baş məşqçisi Musa ilə razılaşmır

İsveçin "Yurqorden" klubunun baş məşqçisi Tomas Laqerlöf növbəti dəfə Musa Qurbanlıya az şans verməsi barədə açıqlama verib.

 

Futbolxeber.az-ın məlumatına görə, bu haqda 52 yaşlı mütəxəssis fotbolldirekt.se saytına danışıb.

 

Bu günlərdə elə həmin media qurumuna müsahibəsində Azərbaycan millisinin hücumçusu M.Qurbanlı U-21 komandasına göndərilməsi haqda ona heç bir izahat verilmədiyini deyib. "Əlbəttə, bu, onların qərarıdır. Bu barədə danışsalar, yaxşı olardı. Amma heç nə demirlərsə, bu, normaldır" - deyə Musa bildirib.

 

Tomas Laqerlöf isə Musanın fikirləri ilə razılaşmır. "O, oynamamağı ilə əlaqədar izah alıb" - deyə məşqçi qeyd edir. 

 

Jurnalistin "Bu izahatı kütləvi informasiya vasitələrindən gizli saxlamaq istəyirsiniz?" sualına baş məşqçi belə cavab verib: "Mətbuat konfransında da söylədiyim kimi, bu, rəqabətlə bağlı məsələdir. Oyun üçün heyətə yalnız 20 futbolçu cəlb edə bilərik".

 

Musa U-21 komandasında keçirdiyi rəsmi matçlarda 2 qol vurub. Bu fakt onun əsas komandaya qayıtmasına kömək edə bilərmi? Bu məsələ barədə danışan Tomas Laqerlöf deyib: "Əlbəttə, hər məşq, hər oyun - bu əsas komandada ola bilər, U-21-də də - özünü göstərmək üçün bir şansdır. Əgər siz yaxşı çıxış edirsinizsə, bu, sizi uğura yaxınlaşdırır. Biz Musaya da demişdik: biz istəyirik ki, heyətdə bütün oyunçular oynasın. Amma bu halda kimisə heyətdən çıxarmalıyıq və onda rəqabət yaranır. Oyundan oyuna hər şey onda asılı olacaq ki, heyətin digər yarısı necə görünür. Siz hücumçuya, yarımmüdafiəçiyə, yaxud digərinə üstünlük verirsinizmi... Amma o, hər yaxşı nəticəsi ilə özünün mövqeyini gücləndirir".

 

Sayt onu da yazıb ki, bu yay Musa "Yurqorden"i tərk edə bilər. Bunun üçün klub 9-10 milyon İsveç kronu (təqribən 850 min avro) tələb edir. Bu, isə "Yurqorden"in Musa üçün "Qarabağ"a ödədiyi məbləğdən (6 milyon) 3-4 milyon kron çoxdur (qol.az).