Sxadadze ilk qələbəsini şərh etdi

“Azarkeşlər üçün maraqlı oyun oldu. Mübarizə və qollar gördük. Bu da inkişaf üçün yaxşıdır. Gənc uşaqlar bu səviyyədə sona qədər mübarizə apardılar. Futbolçularımı təbrik edirəm”.

Futbolxeber.az saytının məlumatına görə, bu sözləri “Qəbələ”nin baş məşqçisi Kaxaber Sxadadze Azərbaycan Premyer Liqasının 33-cü turunda səfərdə "Səbail"i 3:2 hesabı ilə məğlub etdikləri oyundan sonra deyib.

Gürcü mütəxəssis qələbədən daha çox gənclərin adına sevindiyini bildirib: “Bu gün iki debütantımız da var idi. Sevinmək üçün xüsusi bir şey yoxdur. Biz sonuncu pillədəyik. Cavanlara görə sevinirəm ki, onlar özlərini meydanda hiss etdilər. Qələbəni də həmçinin. Ümidvaram ki, bu cür davam edəcəklər və qalan görüşlərdə özümüzü yaxşı tərəfdən göstərəcəyik. Onlar yaxşı məşq edirlər, hətta daha yaxşı oynaya bilərlər”.

O, ilk qələbəsini gec qazanmasının səbəbini belə izah edib: “Öncəki oyunlarda biz daha çox epizod yaradırdıq, nəinki bu gün. Epizodlarda soyuqqanlılıq, keyfiyyət özünü göstərməlidir. "Neftçi" qapıya bir zərbə vurdu, uddular. Biz isə 5 qol epizodunu boşa verdik. Ustalıq tək texnika deyil, psixologiya da var. Komanda çox uduzurdu deyə, inanmsızlıq yaranırdı. Komanda sonuncu pillədədir. Mental hazırlıq çatışmırdı”.

“Sizin burada olmadığınız zamanda Azərbaycan çempionatının və hakimliyin səviyyəsi dəyişibmi?” sualını Sxadadze belə cavablandırıb: “Hakimlik haqda şərh verməyəcəm. Onlara hörmətlə yanaşıram. Birinci hissədə əsəbi idim, amma üzrxahlıq etdim. Suallar hər zaman olur. Amma artıq bağlandı. "Qarabağ" tamam başqa səviyyədədir. Digərləri isə hamısı eyni gücdədir. Hamı bir-birini məğlub edə bilər. Bu da maraqlıdır. Azərbaycan çempionatında azarkeş çatışmır. Bu çempionat daha çox azarkeşə layiqdir. Azarkeşlər çempionatı dəstəkləməlidir. Çox istəyərdim ki, onlar çox gəlsin. Çempionat azarkeşsiz maraqsızdır. Daha çox gələcəklər, Premyer Liqanın səviyyəsi də artacaq”.

K.Sxadadze qeyd edib ki, bölgələrdə azarkeş problemi yoxdur: “Bakıda isə var. Azarkeşlərə hörmətlə yanaşıram. Görün nə qədər komanda avrokuboklar uğrunda mübarizə aparır. Əvvəlki illərdə "Xəzər Lənkəran", "Qəbələ", "Bakı", "İnter" kimi çox yaxşı komandalar var idi. "Neftçi" də həmişə "Neftçi"dir. Hər zaman burada liqa çətin idi, indi də. Amma əvvəlki dövrdə futbolçuların adlarına görə başqa səviyyədə idi. Çünki maliyyə məsələsi də var. Məncə, bu da qayıdacaq. Çünki çempionat inkişaf edir, bura maraq da çox olacaq. Azərbaycan gözəl ölkədir, stadionlar da gözəldir. "ASCO Arena"nın süni örtüklü meydançası da əla idi. Daha da inkişaf etmək üçün hər cür imkan var”.

Təcrübəli mütəxəssis elitadan düşməkləri rəsmiləşdikdən sonra futbolçularının daha rahat oynaması barədə fikrə birmənalı cavab verməkdə çətinlik çəkib: “Çətindir demək. Bir çox detallar bir-birinə bağlıdır. Əvvəl olmayan şeylər bu gün oldu. Əvvəlki matçlarda çox epizod yaradırdıq, vura bilmirdik. Gənc futbolçular üçün Premyer Liqada oynamaq xoşdur. Futbolçu birinci dəfə oyuna çıxırsa, onun üçün komandanın liqadan düşüb-düşməməsi önəmli deyil”.