Qurban Qurbanov: "Neftçi"yə qarşı hamı istəkli oynayır"

“Futbolçularımı təbrik edirəm. Azarkeşlər üçün maraqlı oyun oldu. Oyundan razı qaldım. Amma daha da səliqəli oynamalıyıq. Çünki, futbol səhvləri bağışlamır. Rəqib istifadə edə bilərdi. Bəsit səhvlər etdik. Buna baxmayaraq, oyun intizamı var idi, futbolçular istəkli idilər. "Neftçi"yə uğurlar arzulayıram”.

Futbolxeber.az saytının məlumatına görə, bu sözləri “Qarabağ”ın baş məşqçisi Qurban Qurbanov Azərbaycan Premyer Liqasının 33-cü turunda öz meydanında "Neftçi"ni 5:0 hesabı ilə darmadağın etdikləri oyundan sonra deyib.

O, Toral Bayramovun ilk hissədəki oyunundan çox narazı qaldığını bildirsə də, mərkəz müdafiəçisi kimi sınadığı Mateus Silvadan razılığını ifadə edib: “Neçə oyundur ki, onu mərkəzdə oynadırıq. Həmin mövqedə istədiyimiz oyunu göstərir. Mateusun hər iki mövqedə eyni səviyyədə oynaması mənim üçün üstünlükdür. Son vaxtlar Mateus tam olaraq özünü bu kollektivin üzvü kimi hiss edir”.

Qurbanov "Qarabağ"ın bu mövsüm “Neftçi” ilə matçlarda xal itirməməsinin xüsusi motivasiya ilə əlaqəli olmadığını vurğulayıb: “Elə oyunlar var ki, daha da çox hazırlaşırıq. Ümumiyyətlə meydana motivasiyasız çıxmaq düzgün deyil. "Neftçi"yə gəldikdə, bəlkə də komandamı ən az bu rəqibə qarşı motivasiya edirəm. Çünki futbolçular istər-istəməz dərk edirlər. Çempionatda ən çox maraq olan oyun "Neftçi" ilə "Qarabağ" arasında olan matçlardır. Tam bizdən asılı olan bir şey deyil. Sadəcə belə uğurlu seriya alındı. "Neftçi" ilə görüşlərdə əlavə nəsə demirik”.

İspaniyada təcrübə keçəcəyi barədə xəbəri təkzib edən Q.Qurbanov bildirib ki, heyəti gücləndirməyə çalışacaqlar: “Ən azından heyəti qoruyub-saxlamağa və güclənməyə çalışacağıq. Lakin "Qarabağ"ın Emre Morla maraqlanmasından xəbərim yoxdur”.

“Keçmiş "Neftçi"li kimi "Neftçi"nin düşdüyü vəziyyət sizə necə təsir edir?” sualını Qurban Qurbanov belə cəzalandırıb: “Mənim cavab verməyim bəlkə də düz olmaz. "Neftçi"yə qarşı hamı istəkli oynayır. O ad həmişə onların üzərindədir. Hər komandanın eniş vaxtı olur. Ola bilər ki, "Neftçi"də bu günlərə düşüb. Nəinki "Neftçi"nin, bütün komandaların, çempionatın aktiv olmasını istəyirəm. Zəmanət yoxdur ki, biz hər il bu səviyyədə olacağıq. Bizdə də hansısa il eniş ola bilər. Buna hazır olmalıyıq. "Neftçi" böyük klubdur. İnanıram ki, tez bir zamanda belə nəticələr geridə qalacaq”.