“Düşünürlər ki, bu imkanlarla necə olur ki, "Sumqayıt" bu yerdədir”

“Azarkeşlərimizə təşəkkür edirəm. Tovuz çox ağır səfərdir. İki həftə əvvəl də burada olmuşuq. Futbolçularım ağır görünürdü. Oyunun əvvəlində 1-2 epizod yaratdıq. Təəssüf ki, ağır hərəkət etməyimiz, gec qərarlar verməyimiz istədiyimiz kimi oynamağa imkan vermədi. Amma səfərdə 1 xal qazana bildik. Digər oyunlara yaxşı hazırlaşacağıq. Bu gün bir çox şeylər məni razı salmadı. Müdafiəçilərimiz ən pis oyunlarını keçirdilər. "Qarabağ"la matçdakı yorğunluqdan irəli gələ bilər”.

Futbolxeber.az saytının məlumatına görə, bu sözləri “Sumqayıt”ın baş məşqçisi Samir Abasov Azərbaycan Premyer Liqasının 33-cü turunda səfərdə "Kəpəz"lə 1:1 hesablı heç-heçə etdikləri oyundan sonra deyib.

Təcrübəli mütəxəssis “2 xal itirdiniz, yoxsa 1 xal qazandınız?” sualını belə cavablandırıb: “Bilmirəm. Oyunun gedişatı heç üzəyimcə deyildi. Özümüz gərginlik yaradırdıq. İtirdiyimizi və ya qazandığımızı növbəti üç oyundan sonra biləcəyik”.

S.Abasov oyunun gərgin keçməyinin səbəbini belə izah edib: “Kəpəz” evdə oynayır, azarkeşlər öz komandalarını dəstəkləyirlər. Bunun yaxşı tərəfi də var. Bizim oyunçular da ayılırlar. Gərginliyin haradan irəli gəldiyini bilmirəm. Futbolçular udmaq istəyirdi. Rəqib futbolçuları qınaya bilmərəm”.

O, "Kəpəz"in "Zirə" və "Neftçi"yə qarşı da belə oynayacağını düşünür: “Oynayacaqlar. Amma bütün aparıcı oyunçuları qırmızı vərəqə aldı. Bu, öz təsirini göstərəcək”.

“Sumqayıt”ın çalışdırıcısı bildirib ki, komandası son üç oyunda təzyiqin altından çıxa biləcək: “Biz çox planları pozmuşuq. Düşünürlər ki, bu imkanlarla necə olur ki, "Sumqayıt" bu yerdədir. Amma biz bu təzyiqin altından çıxmalıyıq”.