“Səbail”in müdafiəçisi: “Son 4 tur bizim üçün finala bərabərdir”

“Oyun yaxşı hazırlaşmışdıq. Məqsədimiz 3 xal qazanmaq idi. “Sabah” hər nə qədər güclü olsa da, rəqibdən qorxmurduq”.

Futbolxeber.az saytına müsahibəsində bu sözləri “Səbail”in müdafiəçisi Adil Nağıyev Azərbaycan Premyer Liqasının 32-ci turunda “Sabah”a 0:2 hesabı ilə uduzduqları oyun barədə danışarkən deyib.

O, ikinci hissədə rəqibdən üstün olduqlarını vurğulayıb: “Matça yaxşı başladıq. Təəssüf ki, yaxaladığımız qol epizodlarını dəyərləndirə bilmədik. Əvəzində isə ani diqqətsizlikdən qapımızda 2 qol gördük. İkinci hissədə isə rəqibdən tam üstün idik. “Sabah”ı qapısına doğru sıxışdırmışdıq. Lakin yenə də qol epizodlarını boşa verdik”.

29 yaşlı mərkəz müdafiəçi avrokuboklar uğrunda sona qədər mübarizə aparacaqlarını söyləyib: “Artıq bu oyunu unutmalı, qarşıdakı matçlara köklənməliyik. Son 4 tur bizim üçün finala bərabərdir. Həmin görüşlərdə maksimum xal qazanmağa çalışacağıq. Daha yuxarı pillələrdə olmaq istəyirik. Bunun üçün gücümüz var”.

Adil Nağıyev növbəti turda “Qəbələ”yə qarşı keçirəcəkləri matçdan da söz açıb: “Hazırda komandamız yaxşı formadadır. Düzdür, ola bilər nəticə baxımından bunu göstərə bilmirik. Lakin oyun planında komandamız heç də zəif deyil. “Qəbələ” ilə matça tam ciddi hazırlaşacağıq. Qalib gəlmək üçün əlimizdən gələni edəcəyik”.

“Səbail”in üzvü bildirib ki, komanda olaraq qarşılarına avrokuboklara vəsiqə qazanmaq məqsədi qoyulmayıb: “Avrokuboklarda oynamağı hər bir komanda istəyər. O cümlədən də biz. Odur ki, mövsümün sonunda qitə kuboklarına vəsiqə qazansaq, yaxşı olar. Alınmasa da, bunu faciəyə çevirməməliyik. Onsuz da rəhbərlik qarşımıza avrokuboklara vəsiqə qazanmaq məqsədi qoymayıb. Lakin komandamız heç də zəif deyil, gücümüz bəllidir. Ona görə də sona kimi mübarizə aparacağıq ki, üst pillələrdə qərarlaşaq”.

A.Nağıyev son zamanlar Premyer Liqada klub sayının artırılacağı barədə yayılan xəbərlərə də münasibət bildirib: “Mövsüm ərzində eyni rəqiblə 4 dəfə oynamaq yorucudur. Digər tərəfdən də rəqiblər artıq bir-birilərini çox yaxşı tanıyırlar, zəif və üstün cəhətlərini bilirlər. Ona görə hesab edirəm ki, futbolumuzun xeyrinə olacaqsa, mən də istərəm ki, komanda sayı artsın. Xüsusən də regionlarda. Çünki bölgələrdəki stadionlarda atmosfer bir başqa olur”.

Fərəc ASLANOV