Valdemar Almeyda: “İlk üçlükdə olmaq üçün bütün oyunlarda qalib gəlməliyik”

“Matç bizim üçün yaxşı başladı. İlk hissədə baxımlı oyunun nəticəsində 1 qol vura bildik. İkinci hissədə də bu tempi saxlayaraq daha bir dəfə fərqləndik. Rəqib olduqca layiqli mübarizə apardı. Biz də işimizin öhdəsindən gəldik. 3 xal “Səbail”in yaxşı oyunundan xəbər verir”

Futbolxeber.az saytına müsahibəsində bu sözləri “Səbail”in yarımmüdafiəçisi Valdemar Almeyda Azərbaycan Premyer Liqasının 31-ci turunda “Araz-Naxçıvan”ı 2:0 hesabı ilə məğlub etdikləri oyun barədə danışarkən deyib.

Son turlar əksər oyunlarda “Səbail” qapısında qol gördükdən sonra daha yaxşı çıxış edir. “Araz-Naxçıvan”la matçda isə paytaxt təmsilçisi hesabı açan tərəf oldu və qələbə qazandı. Portuqaliyalı yarımmüdafiəçi bildirib ki, belə oynamaq komandası üçün daha xeyirlidir: “İlk qolu vurmaq komandaya özünəinam bəxş edir. Bundan sonra daha rahat oynamağa başlayırıq. Amma hər bir komanda ilə oyunda hesabı açmağı bacarmırıq. Bu, həmişə mümkün olmur. Amma məşqlərdə biz əlimizdən gələni edirik ki, komandaya fayda verək. Hesabda önə keçdikdən sonra ikinci hissədə müdafiədən oynadıq, rəqibi əks-hücumda yaxalamağa çalışırdıq. Futbolda belə hallar normal hesab olunur”.

Hazırda 42 xalla altıncı pillədə qərarlaşan “Səbail”i ikinci yerdən cəmi 5 xal ayırır. V.Almeyda sona 5 tur qalmış komandasının avrokubok şansını belə qiymətləndirib: “Əlbəttə, “Araz-Naxçıvan” üzərində qələbə ilə şanslarımızı saxlamış olduq. 3 xalı qazanmağa ehtiyacımız var idi və növbəti oyunlarda da bu nəticələrin sayını artırmalıyıq. Ötən oyunda 2 xal itirmişdik”.

O, növbəti turda "Sabah"a qarşı keçirəcəkləri matçdan da söz açıb: “Məqsəd hər bir matçda qələbə qazanmaqdır. Bu strategiyamızı qorusaq, ardı gələcək. İlk üçlükdə olmaq üçün bütün oyunlarda qalib gəlməliyik”.

Son zamanlar hakimlərin bəzi oyunlarda “Səbail”ə dəstək olduğu barədə şayiələr yayılıb. “88 nömrə” bu söz-söhbətlərə belə münasibət bildirib: “Bu fikirlər düzgün deyil. “Araz-Naxçıvam”la matçda fikrimcə, hakim işi yüksək səviyyədə idi. Azərbaycan çempionatında hər bir hakim matçı yaxşı idarə edir. Hakimlərin idarəçiliyini bəyənirəm. Əslində, oyunçu kimi bu barədə danışmaq düzgün deyil. Ola bilər ki, hakimlər yanlış qərar versin, amma video təkrar texnologiyası (VAR) onların daha obyektiv qərar verməsinə dəstək olur”.

Azad NURİYEV