“Sumqayıt”ın yarımmüdafiəçisi: “Hələ heç nə bitməyib, mübarizə qabaqdadır”

“Zirə” ilə oyun ağır keçdi. Belə olacağını da gözləyirdik. Meydana qələbə üçün çıxmışdıq. Yekunda qazancımız 1 xal oldu. Buna da şükür. Hələ heç nə bitməyib, mübarizə qabaqdadır”.

Futbolxeber.az saytına müsahibəsində bu sözləri “Sumqayıt”ın yarımmüdafiəçisi Səbuhi Abdullazadə Azərbaycan Premyer Liqasının son turunda “Zirə” ilə qolsuz bərabərə qaldıqları görüşü şərh edərkən deyib.

22 yaşlı futbolçu avrokuboklar uğrunda sona qədər mübarizə aparacaqlarını bildirib: “Sona 6 tur qalmış dördüncü yerdəyik. Lakin bununla kifayətlənə bilmərik. Qarşıdakı matçlara çox ciddi hazırlaşmalıyıq. Çünki meydana özümüzdən razı halda çıxsaq, altıncı-yeddinci yerə də düşə bilərik. Sona qədər hər xal üçün savaşmalıyıq”.

S.Abdullazadə sumqayıtlı azarkeşlərdən də söz açıb: “Neftçi” ilə açılış matçında stadionda anşlaq idi. Sonrakı matçda isə tribunalar demək olar ki, tam boş idi. Lakin sonradan yavaş-yavaş dolur. “Zirə” ilə görüşdə azarkeş sayı 5-6 min olardı. İnanıram ki, növbəti matçlarda stadionda bizi daha çox azarkeş dəstəkləyəcək”.

O, növbəti turda “Turan Tovuz”a qarşı keçirəcəkləri matçdan da danışıb: “Bizi çətin səfər gözləyir. Tovuza qələbə üçün yollanacağıq. Azarkeşlərimizi sevindirmək üçün əlimizdən gələni edəcəyik”.

Fərəc ASLANOV