Şahin Diniyevdən mesaj: “Başqasının musiqisinə oynamayın”

“Belə oyundan sonra danışmaq çox çətindir. İki fərqli hissə izlədik. İlk yarıda bəsit qollar buraxdıq. İkinci hissədə komanda həm xarakter göstərdi, həm də oyunla "Kəpəz"i sıxmağa başladı. 4 dəqiqə əlavə olunan matçda son dəqiqədə qol buraxmaq çox ağırdır”.

Futbolxeber.az saytının məlumatına görə, bu sözləri "Səbail"in baş məşqçisi Şahin Diniyev Azərbaycan Premyer Liqasının 30-cu turunda doğma meydanda "Kəpəz"lə 3:3 hesablı heç-heçə etdikləri oyundan sonra deyib.

Mütəxəssis hakimlərin komandasına kömək etməsi barədə fikir səsləndirənlərə də mesaj göndərib: “Hakimlər oyunu ideal idarə etdi. Sadəcə vaxt çox artırdı. Qırmızı vərəqəyə baxılmasını çox istərdim. Sonda buraxdığımız qol hər şeyin üstündən xətt çəkdi. Futbolun iki üzü var. Kim deyirsə ki, "Səbail"ə hakimlərin simpatiyası var, yanlışdır. Başqasının musiqisinə oynamağa çalışmayın. Növbəti oyuna hazırlaşmaq lazımdır. Futbolçularıma təşəkkür edirəm. İkinci hissədən tam razı qaldım”.

O, mühüm 2 xal itkisinə baxmayaraq, sona kimi mübarizə aparacaqlarını vurğulayıb: “Komanda o vəziyyətdə deyil ki, udmaq qabiliyyəti olmasın. Hər rəqiblə başabaş mübarizə aparıb qələbə qazanmaq şansımız var. Futbolçular, rəhbərlik və mən bir gəmidə gedirik. Gəminin də kapitanı mənəm. Kapitan inanmırsa, gəmini sürməyə dəyməz. İnanıram. Qarşıda 6 tur var. Biz "bitdi" demədən bitməyəcək. Qarşımıza qoyulan məqsəd ilk 6-lıqda olmaq idi. İndi Avropa zonasına yaxın olduğumuz üçün vuruşuruq. Düşməsək də, dünyanın sonu deyil”.

Diniyev "Səbail"in əksər oyunlarda fasilədən sonra daha yaxşı oynamasının səbəbini belə izah edib: “Futbolçular istəyirlər ki, tez qol vursunlar. Buna görə təzyiq yaranır. Komandanın funksional hazırlığı yüksək səviyyədədir. İkinci hissədə itiriləsi heç nə yoxdur deyə komanda dəyişir”.

Təöcrübəli mütəxəssis komandasının üzvü Adi Mehremiçin qırmızı vərəqə aldığı epizodu belə dəyərləndirib: “Dava edənlərin ikisinə də qulaq assan, ikisi də düzdür. Deyə bilmərəm ki, hakim səhvdir, yoxsa Mehremiç. Bunu hər ikisinin vicdanına buraxıram”.