Tamaş azarkeşlərə səsləndi: “Neftçi” uğrunda hamımız döyüşməliyik”

“Neftçi”nin müdafiəçisi Mark Tamaşın Futbolxeber.az saytına müsahibəsi

- Azərbaycan Premyer Liqasının 30-cu turunda “Araz-Naxçıvan”nı 3:0 hesabı ilə üstələdiniz. Bu qələbəni necə şərh edərdiniz?

- Deyə bilərəm ki, nəhayət öz oyunumuzu göstərə bildik. Baxımlı matç idi. Əks-hücumda çox təhlükəli olurduq. Bu səbəbdən də fərqlənə bildik. 3:0 hesabı möhtəşəm qələbədən xəbər verir.

- Demək olar ki, ilk dəqiqələrdə vurulan qol qələbədə böyük rol oynadı?

- Vurduğumuz hər bir qolun qələbədə mühüm rolu var. İlk dəqiqələrdə vurulan qol da bu baxımdan əvəzolunmazdır. Düşünürəm ki, 3 qoldan sonra daha sakit oynadıq, özümüzə daha çox inamlı olduq. Son dəqiqələrdə bir o qədər həyəcan yaşamadıq. Bu qələbəyə layiq idik.

- Qələbə sayəsində turnir cədvəlində ikinci pilləyə yüksəldiniz. Sona 6 tur qalmış avrokuboklar şansını necə dəyərləndirirsiniz?

- Addım-addım bu yolda irəliləyirik. Hər bir oyuna ciddi şəkildə köklənərək qələbələr qazanmaq lazımdır. Hazırda ikinci yerdəyik. Amma Azərbaycan çempionatında bütün klublar bir-birinə xal baxımdan çox yaxındır. Biz öz formamızı qoruyub bu cür oynamalıyıq ki, ikinci pillədəki mövqeyimizi qoruyaq. Belə oynasaq, yekunda gümüş medal qazanacağıq. Bu, bizim hədəfimizdir.

- Növbəti turda "Zirə"nin qonağı olacaqsınız. Bu görüşdən gözləntiləriniz nədir?

- "Zirə" ilə matç derbi səviyyəsində olacaq. Hər iki komanda qonşu pillələrdə qərarlaşıb. "Zirə" yaxşı formadadır. Bu matçı səbirsizliklə gözləyirəm.

- Azarkeşlərsiz oynamaq işinizi nə dərəcədə çətinləşdirir? Onları stadiona qaytarmaq üçün nə demək istərdiniz?

- "Neftçi" olaraq, baxımlı futbol oynamalıyıq. İnamlı olub ardıcıl qələbələr qazana bilsək, azarkeşlər də stadiona qayıdacaq. Ümid edirəm ki, bu, tezliklə baş verəcək. "Neftçi" uğrunda hamımız döyüşməliyik.

Azad NURİYEV