Azərbaycan derbisinə sözardı

“Xalqın komandası bu gün dəstəksiz qalmayıb...” Dünən “Neftçi Arena”da gördüyüm ilk mənzərə məhz bu idi. Feysbukda eynən bu başlıqla etdiyim paylaşımın altında müzakirələr hələ də davam edir. Amma fikrimdə qalıram. Xalqın komandası çempionluqlarla, avrokuboklardakı uğurlarla ölçülmür. Çox uzağa getməyək. “Spartak” son illər “Neftçi”dən də pis gündədi. Bu gün Rusiyada futbolun dəbini “Zenit”, ÇSKA, “Krasnodar” müəyyənləşdirir, amma “Xalqın komandası” yenə də “Spartak”dır...

Təəssüf ki, matçın startından cəmi 10-15 dəqiqə sonra dünən “Neftçi Arena”ya toplaşanların əksəriyyətinin sadəcə tamaşaçı olduğu bilindi. Fanat hər iki qapının arxasında əyləşənlər idi...

“Forza Neftçi”ni hər zaman 1 nömrə saymışam. Dünən açdıqları banner(lər)lə bunu göstərdilər. Amma “İmarət”in də haqqını vermək lazımdır. 90 dəqiqə boyu möhtəşəm idilər.

4:1-dən (yaxud 1:4-dən) sonra oyun barədə uzun-uzadı nəsə yazmağa ehtiyac yoxdur. Matçla bağlı sadəcə bir məqama toxunmaq kifayət edər. Bu gün “Qarabağ” qeyri-şərtsiz ölkənin ən güclüsüdür. Bunu danmaq insafsızlıq, hətta bir az sərt də çıxsa, vicdansızlıq olar. Bu, reallıqdır. Elə turnir cədvəlinin hazırkı vəziyyəti də bu fikri təsdiqləyir. “Qarabağ”ın heç bir oyunda hakim köməyinə ehtiyacı yoxdur. Hətta 10 nəfərlə belə qalib gəlməyə qadirdir Qurban Qurbanovun komandası. Lakin bəzən hakimlər “Qarabağ”ın lehinə yanlış qərarlar verməklə rəqib azarkeşlərdə qıcıq oyadırlar.

Eynən dünən Yankoviç-Emin mübarizəsində olduğu kimi. Bu fikirlə razılaşmayanlar çox olsa da, məncə, həmin epizodda Yankoviçə qırmızı vərəqə düşürdü. Bəlkə də hakim həmin epizodda qırmızı vərəqə versəydi, “Qarabağ” azlıqda da yenə də qalib gələcəkdi. Ağdam klubu bu gün o qədər güclüdür. Lakin yuxarıda da qeyd etdiyim kimi, hakimin səhvi qıcıq oyadır. Axı eyni olmasa da, buna bənzər epizodda çox yox, cəmi 3 gün əvvəl “Qəbələ”nin yarımmüdafiəçisi Feras Abu Akala qırmızı vərəqə göstərilmişdi. Özü də məhz “Qarabağ”la oyunda. Dünən hakim haqlı idisə, onda belə çıxır ki, 3 gün əvvəl Ağdam klubu ilə oyunda “Qəbələ”nin haqqı yeyilib. Ədalət naminə demək lazımdır ki, dünən hakimin “Neftçi”nin də lehinə səhvi oldu. İkinci hissədə Nəriman Axundzadə ilə Yuri Matiasın epizodunda ikinci əllə oynamışdı. Lakin nədənsə Məsiyev həmin epizodda penalti nöqtəsini göstərmədi. 

O ki qaldı “Yankoviç bilərəkdən kobud oynamadı”, “görmürdü”, “bilmirdi” kimi ifadələrə, o məntiqlə “Qarabağ”ın ikinci qolunda da Yuri Matias bilərək topu rəqibə “hədiyyə etmədi”. Yaxud Qara Qarayev qəsdən ilk qolda səhv ötürmə verdi. Yeri gəlmişkən dünəndən “Neftçi” azarkeşləri sosial şəbəkələrdə Qaranın yanlış ötürməsindən gileylənirlər. Amma məncə, Qarayevi qınamağa dəyməz. Mənə görə Qarayev dünən meydanda canını qoydu və bəlkə də “Neftçi”dəki ən yaxşı oyununu keçirdi. Sabiq klubu ilə matça onun tam başqa motivasiya ilə çıxdığı hiss olunurdu.

Bir-iki kəlmə də Miodraq Bojoviç barədə. Nəticəni kənara qoysaq, monteneqrolu mütəxəssis ilk sınaqdan çıxmağı bacardı. “Neftçi” dünən ustalığa görə rəqibinə uduzsa da, əzmkarlıqla, döyüşkənliklə bunu sığortalamağa çalışırdı. Ən azı hiss olunurdu ki, komanda nə isə etməyə çalışır. 1:2-dən sonra “ağ-qaralar”ın bir qədər bəxti gətirsəydi, nəticə fərqli də ola bilərdi. Fikrimdə qalıram: Bojoviçə vaxt və material lazımdır. Bir-bir ad çəkib, kiminsə futbolçu keyfiyyətini aşağılamaq istəmirəm. Amma hazırkı heyətlə Bojoviçin edə biləcəyi maksimum budur... 

İBRAHİM