“Araz-Naxçıvan”ın “qəbirqazan”ı: “Təkcə Premyer Liqada qalmaqla kifayətlənmək istəmirik”

“Araz-Naxçıvan”la oyunda vurduğu 2 qolla “Kəpəz”in qələbəsində böyük pay sahibi olan Ehtiram Şahverdiyevin Futbolxeber.az saytına müsahibəsi

- Azərbaycan Premyer Liqasının XXI turunda “Araz-Naxçıvan”la matçda qazanılan 3:1 hesablı qələbəni necə şərh edərdiniz?

- “Araz-Naxçıvan” yaxşı komandadır. Biz də oyuna ciddi hazırlaşmışdıq ki, xal və ya xallar qazanıb azarkeşlərimizi sevindirək. Şükürlər olsun k, istəyimizə çatdıq. Yekunda sevinən tərəf biz olduq.

- Vurduğunuz 2 qolla “Kəpəz”in qələbəsində böyük pay sahibi oldunuz...

- Nə xoş ki 2 qol vurdum və komandam qələbə qazandı. Buna görə çox sevinirəm. Allah eləməmiş, bu qolları vurduqdan sonra qalib gəlməsəydik, bu qədər sevinməzdim. Çünki əsas olan komandanın qələbəsidir. Mənim, yaxud başqasının fərqlənməsinin böyük önəmi yoxdur. Qazanılan 3 xal daha vacibdir.

- Son turlar “Kəpəz” xoş təsir bağışlayır, nəticələr də göz önündədir. Adil Şükürovun gəlişi komandada nəyi dəyişdi?

- Hər məşqçinin özünə xas futbol fəlsəfəsi var. Adil müəllim də öz fəlsəfəsini bizlərə aşılamağa çalışır. Əlimizdən gələni edirik ki, məşqçilərin tapşırıqlarını düzgün şəkildə yerinə yetirək, hər matçda xal və ya xallar qazanaq. Düşünürəm ki, zaman keçdikcə daha yaxşı durumda olacağıq.

- Hazırda sonuncu pillədəki “Qəbələ”ni 5 xal qabaqlayırsınız. Bu fərq arxayınçılığa gətirib çıxarmayacaq?

- Xeyr. Bununla kifayətlənmək olmaz. Bəzi səhvlərimiz var. Son turlar yaxşı çıxış etsək də, çatışmazlıqlarımız da yox deyil və bunun üzərində işləyirik.

- Necə düşünürsünüz, mövsümün sonunda “Kəpəz” qarşıya qoyulan hədəfə çatıb Premyer Liqada qalacaq?

- Çempionat gərgin keçir. Bizim məqsədimiz “Kəpəz”i düşdüyü vəziyyətdən daha yaxşı yerlərə daşımaqdır. Bəli, birinci növbədə məqsədimiz Premyer Liqada qalmaqdır. Lakin təkcə bununla kifayətlənmək istəmirik. Daha yaxşı yerlərdə olmaq istəyirik.

- “Kəpəz” ev oyunlarını Qəbələdə deyil, Gəncədə keçirsəydi, nəticələr daha yaxşı ola bilərdi?

- Gəncədəki atmosfer tam başqadır. Rəqib kimi də orda oynamışam. Düşünürəm ki, doğma meydanımızda oynasaydıq, daha yaxşı olardı. Çünki Gəncədə komandanı daha çox azarkeş dəstəkləyir. Bu da bizim üçün stimuldur. Lakin fanatlarımıza təşəkkür edirəm ki, onlar Qəbələdə də bizi dəstəksiz qoymurlar. Biz də onları sevindirməyə çalışırıq.

- Son 3 ev oyununda “Kəpəz” 7 xal qazanıb. Bu uğurlu çıxışı növbəti turda “Səbail”lə matçda da davam etdirmək mümkün olacaq?

- İnanıram ki, mümkün olacaq. Düzdür, oyuna hələ 1 həftə var. Bu matça da ciddi hazırlaşacağıq. Əlimizdən gələni edəcəyik ki, yaxşı nəticə qazanaq. Lakin unutmaq olmaz ki, “Səbail”in çox yaxşı heyəti var, keyfiyyətli futbolçulara sahibdirlər. Odur ki, bizi qarşıda çox çətin qarşılaşma gözləyir.

Fərəc ASLANOV