“Turan Tovuz”un qapıçısı: “Hədəflərimiz dəyişməyib” (MÜSAHİBƏ)

“Turan Tovuz”un qapıçısı Aydın Bayramovun Futbolxeber.az saytına müsahibəsi

- Artıq 10 gündür məşqləri bərpa etmisiz. Hazırlıqlar necə gedir? Komandada ab-hava necədir?

- Məşqlərimiz yaxşı keçir, hər şey qaydasındadır. Yaxşı hazırlıq keçmək üçün hər cür şəraitimiz var. Ağır məşqlər keçirik. Elə gün olur ki, gündə 2 dəfə məşqə çıxırıq. Bütün bunlar hamısı çempionata hazır olmaq üçündür. İnşallah yanvarın 17-də Bakıya hazır vəziyyətdə geri qayıdacağıq.

- Əvvəlki illərdən fərqli olaraq, bu dəfə fasilə müddəti çox az oldu. Hardasa cəmi 10 gün dincələ bildiz. Fasilədən necə yararlandın, az da olsa, istirahət etmək mümkün oldu?

- Deməzdim ki, fasilə üçün vaxt az oldu. Çünki normalda elə 1 həftə istirahət olandan sonra artıq futboldan ötrü darıxmağa başlayırsan. Düşünürəm ki, 10 gün kifayət etdi ki, futboldan tam uzaqlaşıb, beynimizi dincəldək, mövsümün ikinci hissəsinə hazır olaq. 

- Fasilənin müddətinin az olmasının hansı müsbət və mənfi tərəfləri var?

- Müsbət cəhəti odur ki, tam formadan düşmürsən. Mənfi cəhəti isə odur ki, dincəlməyə çox vaxtın olmur. Elə futbolçular var ki, xaricə yollanırlar. Altı ay ailələrindən uzaq qalırlar. Fasilə az olanda onlarla çox vaxt keçirə bilmirlər.

- Hazırlıq çərçivəsində ilk yoxlama oyununda “Voluntari”yə 0:2 hesabı ilə uduzduz. Həmin qarşılaşma barədə nə deyə bilərsən?

- Hazırlıq oyun idi. Bilirsiz ki, yoxlama görüşləri çempionat matçlarından fərqlənir. İki heyətlə oynadıq. Özü də yüklənmə üzərində oynayırdıq. Çünki 1 həftə idi ağır məşqlər keçirdik. Əsas odur ki, zədəsiz qarşılaşmanı başa vurduq. Yoldaşlıq görüşlərində nəticə o qədər də önəmli deyil.

- Çempionatın ikinci yarısından gözləntilərin nədir?

- İlk növbədə tam formaya düşüb, mövsümün ikinci yarısına yaxşı start vermək lazımdır. Hədəflərimiz dəyişməyib. Yuxarı pillələrdən qopmamalıyıq. Bacardığımız qədər ön pillələrdə olmaq istəyirik.

- Bu mövsüm kubokla erkən vidalaşdız. Bu məqam komandanızın xeyrinə olacaq, yoxsa ziyanına?

- Deməzdim ki, xeyrinə olacaq. Çünki hamı kuboku qazanmaq istəyrik. Bilirik ki, ölkə kuboku Avropaya yollanmaq üçün ən qısa yoldur. Biz də kubokla 1/8 finalda vidalaşdığımız üçün təəssüflənirik. Burda yeganə müsbət məqam odur ki, bundan sonra tam olaraq çempionata köklənəcəyik.

- Son zamanlar bir çox futbolçular ölkə xaricinə, xüsusən Türkiyə I Liqasına yollanırlar. Elə ən sonuncu komanda yoldaşın Sərtan Taşkın oldu. Sənin də belə bir fikrin varmı? Ümumiyyətlə, ölkə xaricindən təklif almısan?

- Sərtana uğurlar arzu edirəm. O ki qaldı mənə, “Turan Tovuz”la bu ilin mayın sonuna qədər müqaviləm var. Odur ki, yaya qədər ancaq hazırkı klubum barədə düşünürəm.

- Bu yaxınlarda bir maraqlı statistika açıqlandı: Azərbaycan Premyer Liqasının 2023/24 mövsümünün ilk yarısında yalnız dörd qapıçı 5 və ya daha çox görüşdə qapısını toxunulmaz saxlayıb ki, sən və “Araz-Naxçıvan”ın legioneri Kristian Avram bu sıralamada üçüncü sıranı bölüşürsüz. Maraqlıdır, bu cür statistikalar sənin üçün nə dərəcədə maraqlıdır?

- O statistikanı gördüm. Orada 12 oyun yazılıb. Lakin səhv etmirəmsə, mən 13 matçda forma geymişəm. Amma çempionat boyu bu cür statistikanın aparılmasından xəbərsiz idim. Gördüm, maraqlı gəldi. Xüsusi amma nəsə deyə bilməyəcəm. Dediyim kimi, bu cür statistikanın aparılmasından xəbərsiz idim.

İbrahim CƏFƏROV