“Qarabağ”ın heyətində portuqaliyalılara qarşı oynamış Gerye: “Azərbaycan çempionu favoritdir”

"Qarabağ"a inanıram. Orada oynamışam və bilirəm ki, bu heyət yüksək təcrübəyə malikdir. Avrokuboklarda komandanın nüfuzu böyükdür. "Braqa"ya gəldikdə, onlar da öz növbələrində yaxşı oyun üslubları var. Böyük ad, nüfuza sahibdirlər. Bu matçlar "Qarabağ" üçün böyük təcrübə olacaq”.

Futbolxeber.az saytına müsahibəsində bu sözləri “Qarabağ”ın sabiq futbolçusu Donald Gerye Ağdam klubunun UEFA Avropa Liqasının pley-offunda Portuqaliya “Braqa”sına rəqib olmasına münasibət bildirərkən deyib.

O, bu cütdə hansısa komandanı fərqləndirməyin çətin olduğunu söyləyib: “Nəticə barədə nəsə deyə bilmərəm. Bilirəm ki, hər iki komanda futbol oynamağı, topla rəftarı sevirlər. "Qarabağ" AL-də bir çox nəticələrlə hər kəsi təəcübləndirib. Belə top kluba qarşı oynamaq "Qarabağ" üçün çətin olacaq. Meydanda hər iki komanda sona qədər mübarizə aparacaq. Hər iki komandanın zəif və güclü cəhətləri var. Ona görə də onlar haqqında dəqiq nəticə bildirmək mənə görə çətindir”.

Gerye qeyd edib ki, ürəyi “Qarabağ”ladır: “Futbol dilində desək, meydanda hər şeyini qoyan komanda qalib olacaq. Ürəyim "Qarabağ"ladır. Buna heç kimin şübhəsi olmasın. Onların hər oyununu izləyirəm. Belə komandada çıxış etdiyim üçün hər zamam fəxr etmişəm. Əlbəttə, bu matçda "Qarabağ"ın qalib gəlməsini istəyirəm. Orada çıxış edən hər kəs bu komandanın adı uğrunda mübarizə aparmalıdır”.

D.Gerye “Qarabağ”ın heyətində 5 il əvvəl digər Portuqaliya təmsilçisi "Sportinq"ə qarşı oynayıb. Haitili futbolçu həmin anları belə xatırlayır: “Sportinq”lə görüş karyeramda oynadığım ən yaxşı matçlardan biri idi. Ümumilikdə, Portuqaliya komandaları fiziki cəhətdən güclü olur. Onlar topla oynamağı, bütün meydan boyu qaçmağı sevirlər. "Sportinq"lə "Braqa" fərqli komandalardır, fərqli oyun üslubları var. Həmin il Lissabon təmsilçisinin heyətində Nani, Bruno kimi yüksək nəticələrə sahib oyunçular var idi. Amma "Braqa"nı çox izləmirəm. Bildiyim odur ki, nüfuzlu ada sahibdirlər. Düşünürəm ki, "Qarabağ" "Braqa" qarşısında favoritdir”.

Gerye bu gün keçiriləcək "Qarabağ" - "Neftçi" matçına da toxunub: “Bu, Azərbaycan üçün böyük derbidir. Bu matçın başlamasını gözləyirəm. Hər iki komandada oynayan biri kimi deyə bilərəm ki, bu klublar daim istedadlı oyunçularla zəngin olublar. Bununla belə, "Qarabağ"ın oyun üslubunu hazırda daha çox bəyənirəm. Onların heyətində 5 il çıxış etmişəm. Qurban Qurbanovun oyun fəlsəfəsinə, mentalitetinə arxayınam və yaxşı tanıyıram. Bu baş məşqçi komandanı həmişə qələbəyə aparan yolda yetişdirir. Futbolçuları döyüşməyə səsləyir. İnanıram ki, "Qarabağ" bu matçda qalib gələcək. "Neftçi" üçün də çətin oyun olacaq. Amma bu komandanın da heyəti də zəngindir. Ümumilikdə Azərbaycan xalqı bu iki komandanın oyunundan zövq alır".

O, sabiq baş məşqçisi Qurban Qurbanovun müsbət keyfiyyətləri barədə də danışıb: "Ağdam təmsilçisi hazırda düzgün yoldadır. Bu matçda "Neftçi"nin onları məğlub etməsi çətin olacaq. Bununla belə, futbolda hər şey baş verə bilər. Qurban Qurbanovun oyununa bələdəm. O insan əgər bu gün "Barselona", sabah "Səbail"lə qarşılaşsa belə, hər iki matça komandasını eyni cür hazırlayacaq. Qurban Qurbanov həmişə meydana çıxıb döyüşməyin lazım olduğunu bizlərə xatırladardı. O, həmişə belə olub, belə də qalacaq. Qurbanov heç vaxt əldə etdikləri ilə kifayətlənən insan deyil, həmişə daha böyük uğurlara can atıb. Oyunçulara da baş məşqçi məhz hər oyunda bunu aşılayıb. Həmişə qarşısında olan oyunçunun kimliyindən asılı olmayaraq yalnız uğur qazanmağın vacibliyini vurğulayıb. Nəticədən asılı olmayaraq maraqlı matç olacaq. Matçın başlamasını səbirsizliklə gözləyirəm”.

Azad NURİYEV