Samir Abasov: “Realist olmalıyıq”

“Bilirdik ki, burada bizim üçün çətin olacaq. Futbolçular əziyyət çəkdilər”.

Futbolxeber.az saytının məlumatına görə, bu sözləri “Sumqayı”ın baş məşqçisi Samir Abasov Azərbaycan Premyer Liqasının XVII turunda Tovuzda “Kəpəz”lə heç-heçə (1:1) etdikləri oyundan sonra deyib.

Təcrübəli mütəxəssis buraxılan qola görə məyusluğunu gizlətməyib: “Süni örtük oyunçulara zərər verir. Həm biz, həm də rəqib təzyiq edirdi. Öz oyun üslubumuzu güdərək mövqe hücumlarına çıxırdıq. Məni üzən buraxdığımız qoldur. Həmin ərəfədə rəqibin təzyiqi var idi. Bunun üzərində işləmişdik. Təəssüf ki, qarşısını alma bilmədik. Futbolçularla danışılası çox şey var. Kubokdan əlavə bir matçımız qalıb. Zədəli oyunçularımız yavaş-yavaş qayıdır. Bu, sevindirici haldır. Hamısı tam şəkildə qayıtsa, daha yaxşı olacağıq”.

O, ilk hissədə komandasının meydanda hərəkətsiz görünməsini səbəbini meydança amili ilə əlaqələndirib: “Bu əziyyəti burada həmişə çəkmişik. Hətta "Qarabağ" da Tovuzda heç-heçə edib. İrad tapa bilmirəm. Bilirəm ki, nədən qaynaqlanır”.

Abasov ötən tur "Qarabağ"dan alınan ağır məğlubiyyətin komandasında təsiri qalmadığını bildirib: “Məğlubiyyətin səbəbi bəllidir. "Qarabağ"a hər bir halda uduza bilərik. Sadəcə bəzi futbolçuların öz mövqeyində oynamaması təsir etdi. O məğlubiyyətin əsas səbəbi fərdi səhvlər idi. Bu gün "Qarabağ"a 0:10 hesabı ilə uduzsan da, hamı səni anlayır”.

Komandasının göstərdiyi xarakterə qane olduğunu söyləyən “Sumqayıt”ın çalışdırıcısı zədədən qayıdan futbolçuları meydana buraxmaqla risk etdiyinin vurğulayıb: “Onları məcburiyyətdən oynatdıq”.

Təcrübli mütəxəssis komandasının ilk dördlük şansını belə dəyərləndirib: “Məqsədimiz oyundan-oyuna səhvləri azaltmaqdır. Bir oyun üslubu ortaya qoymaq və onu qorumaq istəyirik. Bu gün heç-heçədən sonra hansı iştahdan danışa bilərik? Mənim dediklərimiz edə bilsək, məqsədlərdən danışa bilərik. Bu gün realist olmalıyıq”.

Fərəc ASLANOV, Tovuz