İcraiyyə Komitəsinin 13 üzvündən 4-ü De Byazinin taleyinin həll olunmasında iştirak etmir: Yetərsay var?

Hazırda AFFA-nın İcraiyyə Komitəsinin fövqəladə iclası keçirilir.

Futbolxeber.az saytının məlumatına görə, saat 10:00-da assosiasiyanın inzibatı binasında başlayan toplantıda komitənin 13 üzvündən 4-ü iştirak etmir. Bunlar Elxan Məmmədov, Mahir Məmmədov, Elmar Məmmədyarov və Fərid Mansurovdur. Digər 9 üzv - Rövnəq Abdullayev, Elşad Nəsirov, Zaur Axundov, İsgəndər Cavadov, Vaqif Sadıqov, Kazbek Tuayev, Rauf Əliyev, Firudin Qurbanov və Könül Mehdiyeva toplantıya qatılıblar.

Bu isə o deməkdir ki, yetərsay var. Çünki 13 üzvdən 7-si toplantıya qatılırsa, bu artıq qəbul olunan qərarların rəsmiləşməsi deməkdir. Bugünkü iclasa isə qeyd etdiyimiz kimi, 13 üzvdən 9-u qatılıb.   

Əlavə edək ki, eyni zamanda şahmat federasiyasının da prezidenti olan Mahir Məmmədov Monteneqroda şahmat üzrə komandalar arasında Avropa çempionatına qatıldığı üçün iclasda iştirak edə bilmir. Əslində, şahmatçılarımızla birgə M.Məmmədov da dünən gecə vətənə dönməli idi. Lakin əlverişsiz hava şəraiti səbəbindən dünən gecəyə nəzərdə tutulan uçuş təxirə salınıb. Elxan Məmmədov Paris olduğu üçün iclasa qatılmır. Elmar Məmmədyarov və Fərid Mansurovun toplantıya qatılmamasının səbəbi isə qeyri-müəyyəndir.