Vüsal İsayev: “Qələbə qazanıb xalqımızı sevindirmək üçün...”

"Oyunlar getdikcə çətinləşir. Bolqarıstanla oyunda hiss etdik ki, kim az səhv etsə, o da qələbə qazanacaq”.

Futbolxeber.az saytına açıqlamasında bu sözləri minifutbol millimizin üzvü Vüsal İsayev dünya çempionatının 1/4 final mərhələsində Bolqarıstanı 3:1 hesabı ilə məğlub etdikləri oyun barədə danışarkən deyib.

O, fiziki cəhətdən yaxşı durumda olduqlarını qeyd edib: “Bolqarlar ilk hissədə qapanmışdı. Bizim fiziki hazırlığımız yüksək səviyyədədir. Dünya çempionatından əvvəl Antalyada yüksək səviyyəli təlim-məşq toplanışı keçmişik. Bunun sayəsində yarımfinala adladıq”.

V.İsayev bu gün yarımfinalda üz-üzə gələcəkləri Qazaxıstan millisi barədə də danışıb: “Avropa çempionatının yarımfinalında da onlarla qarşılaşmışdıq. Artıq finala bir şey qalmayıb. Qələbə qazanıb xalqımızı sevindirmək üçün bütün gücümüzü ortaya qoyacağıq”.

Millimizin üzvü matça tam heyətlə çıxacaqlarını vurğulayıb: “Komandamızda zədəli oyunçu yoxdur. Bu hal bizim üçün üstünlükdür. Rəqibin heyətində isə səhv etmirəmsə, 2 cəzalı futbolçu var”.