PFL-in vitse-prezidenti: “Problemlərdən qorxub hansısa gedişlər etməməyimiz doğru deyil”

“İkinci Liqada çıxış edən komandalarla bağlı onu deyə bilərəm ki, biz onlarla danışanda ilk sualımız o oldu ki, dövlətin ayırdığı 50 min manatdan əlavə, ayrıca vəsait xərcləməyə imkanınız varmı? Hamısı da cavab verdi ki, bəli, dövlətin ayırdığı yardımdan başqa da maliyyə dəstəyimiz, sponsorlarımız var”.

Futbolxeber.az saytına müsahibəsində bu sözləri Peşəkar Futbol Liqasının (PFL) vitse-prezidenti Aslan Şahgəldiyev ölkə kubokunda mübarizə aparan II Liqa təmsilçilərinin səfər oyunlarına yollanarkən maddi baxımdan çətinliklə üzləşmələri ehtimalına münasibət bildirərkən deyib.

PFL rəsmisi qeyd edib ki, çətinliklərdən qorxmaq lazım deyil: “İkinci Liqa bu il yaranıb. Bir növ pilot layihə kimidir. Orda da problemlərin olması normal haldır. Bəli, çətinliklər var, biz bunu dana bilmərik. Siz özünüz də bunları görürsüz. Lakin problemlərdən qorxub hansısa gedişlər etməməyimiz doğru deyil. Uzun müddətdən sonra ilk dəfə ölkə kubokunda 34 komanda mübarizə aparacaq. Özünüz də gördüz ki, kubokun püşkatma mərasiminə gələnlər zala yerləşmirdilər. Elə buna görədir ki, tədbiri AFFA-nın intizabi binasında deyil, başqa məkanda keçirdik. Çünki bu qədər insanı AFFA-nın konfrans zalına yerləşdirmək mümkün deyildi. Halbuki kubokun əvvəlki püşkatmalarında məhdud sayda şəxs iştirak edirdi”.

A.Şahgəldiyev cari mövsümdə bütün liqalarda gərgin mübarizənin getdiyinə şahidlik etdiyimizi bildirib: “Problemlərdən qorxmaq lazım deyil. Düşünmürəm ki, səfərə getmək II Liqa klubları üçün problem yaratsın. Əksinə, kubok qarşılaşmaları onlar üçün çox böyük təcrübə olacaq, peşəkar komandalarla üz-üzə gələcəklər.  Cari mövsüm bütün liqalarda idman mübarizəsi var. Turnir cədvəlinə baxanda bunu görmək mümkündür”.

O bildirib ki, çətinliklər hər hansı işə başlamağa mane olmamalıdır: “Keçən yay İmişli stadionuna təftişə yollananda dəhşətə gəldik. Qazon acınacaqlı vəziyyət idi, tikan, qamış basmışdı. Amma bir neçə gün əvvəl komandanın gv oyununa baxmısız yəqin. Meydançanın durumu göz oxşayırdı. Qazondan əlavə, paltardəyişmə otaqları təmir olunub, isti su gəlir, sulanma sistemi quraşdırılıb. Bir sözlə, hər il irəliyə doğru addım atırıq. Ola bilər kimsə düşünür ki, bu, sürətli addım deyil. Amma istənilən halda dayanmaq olmaz, hardansa başlamaq lazımdır. Neqativi düşünüb bir işi görməməkdənsə, həmin işi görüb, sonra ortaya çıxan problemi həll etmək daha məqsədəuyğundur”.

Fərəc ASLANOV