Şahin Diniyev: “Hər iki cəbhədə vuruşacağıq”

“Səbail”in baş məşqçisi Şahin Diniyevin Futbolxeber.az saytına müsahibəsi

- Bu gün Azərbaycan Premyer Liqasının XII turunun - “Zəfər turu”nun açılış matçında “Turan Tovuz”la qarşılaşacaqsız. Ardıcıl 2 xal itkisindən sonra “Səbail” bu gün qələbə qazana biləcək?

- Hər oyuna son matç kimi yanaşırıq. Turnir cədvəlindəki sıxlıq, hər komandanın digərinə yaxın olması səbəbindən 3 xallıq sistemdə hər matç böyük əhəmiyyət kəsb edir. Bu gün də meydana 3 xal üçün çıxacağıq.

- Rəqibi necə dəyərləndirirsiz?

- “Turan Turan” güclü rəqibdir. Yaxşı məşqçiləri var. Taktiki cəhətdən ağılı oynayırlar. Rəqibin heyətindəki futbolçuların bacarığı uğurlu nəticə qazanmağa imkan verir.

- Vacib oyunöncəsi heyətdə hansı itkilər var?

- Zədəlilərimiz çoxdur. Adil Nağıyev əvəzedicilərin heyətində sıradan çıxdı, əməliyyat olunan Vüqar Həsənov yenicə komandaya qoşulub. Yusif Nəbiyev zədəlidir. Durumuna bu gün aydınlıq gələcək. İndidən meydana çıxıb-çıxmayacağı məlum deyil. Adi Mehremiçin də kiçik zədəsi var. Lakin düşünürəm ki, bu gün o, komandaya kömək edə biləcək. Cabir Əmirli bilirsiz ki, əməliyyat olunub. Onun yoxluğu ciddi itkidir. Fikir verdizsə, bütün itkilərimiz arxa xətlə bağlıdır. Buna görə də müdafiədə ciddi problemlərimiz ola bilər.

- Bilirəm ki, hazırda bütün diqqətinizi çempionata yönəltmisiz, lakin kubokla bağlı da fikirləriniz maraqlıdır. Artıq turnirin püşkü atılıb. Nəzərə alsaq ki, finala qədər “Qarabağ”, “Neftçi” və “Sabah”la qarşılaşmaq ehtimalınız yoxdur, püşkü “Səbail” üçün uğurlu hesab etmək olar?

- Düz deyirsiz, doğrusu, hazırda kuboku düşünmürəm. Yaxşı yerdə olduğumuz üçün bütün gücümüzü, fikrimizi çempionata yönəltmişik. Amma bu o demək deyil ki, kuboka ciddi yanaşmayacağıq. Kubok oyunlarına zaman var. İlkin mərhələlərdə heyətdə rotasiya da edə biləcəyik. Bu, müsbət haldır. Razıyam ki, “Qarabağ”, “Sabah” və “Neftçi”nin bir setkada olması digərlərinə final şansı verir. Amma digər klubları da unutmaq olmaz. “Səbail”, “Zirə”, “Turan Tovuz”, “Araz-Naxçıvan”, “Qəbələ” - bu klubların səviyyəsi arasında ciddi fərq yoxdur.

- Böyük ehtimalla, 1/8 finalda “Şamaxı” ilə qarşılaşacaqsız. “Səbail” ötən mövsüm Premyer Liqadan uzaqlaşdırdığı “Şamaxı”nı bu mövsüm də kubokdan kənarlaşdıra biləcək?

- İndidən bu haqda danışmaq tezdir. “Şamaxı”nı keçmək heç də asan olmayacaq. Hazırda Premyer Liqada olmasa da, bu komandanın təcrübəsi var. Odur ki, bizi heç də asan oyun gözləmir.

- Hər nə qədər zaman olsa da, sensasiya baş verməyəcəyi təqdirdə 1/4 finalda “Zirə” - “Turan Tovuz” cütünün qalibi ilə qarşılaşacaqsız. Bu komandalardan hansını rəqib kimi görmək istərdiz?

- İlk növbədə ora çatmaq lazımdır. Digər tərəfdən də dediyim kimi, Premyer Liqada hazırda qüvvələr nisbəti eynidir. Rəqiblər arasında ciddi fərq yoxdur. Həm “Zirə”, həm də “Turan Tovuz” ciddi rəqibdir.