Şahin Diniyev: “Panikaya düşmürük, yıxılmışıqsa, qalxmalıyıq” (MÜSAHİBƏ)

“Səbail”in baş məşqçisi Şahin Diniyevin Futbolxeber.az saytına müsahibəsi

- Ötən tur “Səbail”in 6 turluq məğlubiyyətsiz oyunlar seriyasına son qoyuldu. Yəqin ki, qarşılaşmadan sonra matçı analiz etmisiz. “Neftçi”yə məğlubiyyətə əsas səbəb nə oldu?

- Hər bir işdə başlanğıc və son var. Qələbə qazanmısansa, məğlub olmağı da qəbul etmək lazımdır. Ən əsası biz oynayaraq məğlub olduq. Oyun üslubumuza görə "Neftçi"dən geri qalmadıq. 3-cü qolu vurub hesabı bərabərləşdirə bilərdik. Lazımsız bir məqamda qapımızdan top buraxdıq. Komandanın ən xoşuma gələn cəhəti hər bir matça qələbə üçün çıxmasıdır. Rəqibin kimliyindən asılı olmayaraq məqsədimiz birdir. Bu oyun da belə oldu. Bəlkə də ikinci qoldan sonra geri çəkilib heç-heçə hesabını qoruya bilərdik. Turnir cədvəli baxımından bu, yaxşı olardı. Futbolçularımız "comeback" etməyə öyrəşiblər. Artıq bir neçə oyundur bunu sübut edirdilər. İstəkli idilər. Komandanın oyun üslubu var. Düşünürəm ki, komanda bu cür davam etsə, xallar toplayacaq. Komandamız dinamik, sürətli futbol oynayır. Futbolçulara inanırıq, heç nədən qorxumuz yoxdur.

- Mövsümün əvvəlinə də komanda məğlubiyyətlə başlamışdı və 3 tur qələbə qazana bilmədi. Təqvimin çətinliyini nəzərə alsaq, eyni ssenarinin ikinci dövrədə də təkrar olmaq ehtimalı sizi nə dərəcədə narahat edir?

- Haqlısınız. İlk 3 turdan sonra 1 xalımız var idi. Amma əvvəlki 9 oyun kimi bu matçlar belə olmayacaq. Bu, tam fərqli bir çempionatdır. Hər bir komanda ölüm-dirim mübarizəsi aparır. Heç kim deyə bilməz ki, bundan sonra bütün oyunlarda uduzacaq və ya qalib gələcək. Bu oyunla nəticələrimiz gələcək. Panikaya düşmürük. Yıxılmışıqsa, qalxmalıyıq.

- Növbəti tur “Zirə” ilə qarşılaşacaqsız. Bu matçı 6 xallıq oyun hesab etmək olar? 

- "Zirə" çempionatımızın lideridir. Bir komanda belə bir çempionatda 10 tur ərzində lider qalıbsa, bu, adi bir şey deyil. Bizi çətin bir oyun gözləyir. Turnir cədvəli baxımından bəli, bu, 6 xallıq oyundur. Prinsipiallıq baxımından bu matçın mahiyyətini anlayırıq. Layiqli oynayıb uğurlu nəticə qazanmağa çalışacağıq. Hesab necə olacaq? Bunu zaman göstərəcək.

- Cabir Əmirlini çıxmaq şərti ilə heyətdə hər hansı bir itki var?

 - Cabir Əmirlidən başqa bir zədəli Vüqar Həsənovdur. Əməliyyatdan sonra qrup məşqlərinə bu həftə qoşulacaq. Digər oyunçularla problem yoxdur.

- Bilirik ki, “Səbail”in ehtiyat oyunçular skamyası geniş deyil.

Artıq bu məqamın əziyyətini hiss etməyə başlamısızmı?

- Rotasiya üçün böyük futbolçu seçimləri olmalıdır. İddialı olub addım-addım irəliləməliyik. Maddi baxımdan o qədər böyük büdcəmiz yoxdur ki, hər mövqeyə 2 eyni səviyyəli oyunçu götürək. Cabirin mövqeyində tək müdafiəçimiz var idi. Mövsümün əvvəlində o mövqeyə lazımi oyunçunu ala bilmədik. Bununla belə, o mövqedə çətinliyimiz olmayacaq. Bunu bəhanə etməyə ehtiyac yoxdur.

- “Qarabağ”ın sabahkı oyunundan gözləntiləriniz nədir? Komandanın Almaniyadan xalla qayıtmaq şansları nə qədərdir?

- Dünən "Qalatasaray" - "Bavariya" matçını izlədik. Münhen klubu Almaniya ikincisidir, "Bayer Leverkuzen" isə Bundesliqa lideridir. Əgər ikinci yerdə olan komanda belə bir futbol oynayırsa, görün, lider necə oyun sərgiləyəcək. “Qarabağ” “İnter”, “Çelsi”, "Roma" kimi komandalara qarşı oynayıb. Amma bu cür futbol oynayan komanda ilə Ağdam təmsilçisi ilk dəfə qarşılaşacaq. Düşünürəm ki, "Qarabağ"ın onlarla oynamağa təcrübəsi çatır. Amma reallıq budur, Leverkuzen təmsilçisi "Qarabağ"dan 2 baş üstündür. Ağdam təmsilçisi taktikanın hesabına "Bayer Leverkuzen"in sürətini azalda bilər. Təmsilçimizin heyətində belə oyunçular var. Hər nə qədər rəqib güclü olsa da, “Qarabağ”dan uğurlu nəticə gözləyirik.

Azad NURİYEV