“Bu cür futbol oynayan komanda ilə “Qarabağ” ilk dəfə qarşılaşacaq” - AÇIQLAMA

“Dünən "Qalatasaray" - "Bavariya" matçını izlədik. Münhen klubu Almaniya ikincisidir, "Bayer Leverkuzen" isə Bundesliqa lideridir. Əgər ikinci yerdə olan komanda belə bir futbol oynayırsa, görün, lider necə oyun sərgiləyəcək”.

Futbolxeber.az saytına müsahibəsində bu sözləri “Səbail”in baş məşqçisi Şahin Diniyev sabah UEFA Avropa Liqasının qrup mərhələsinin üçüncü turu çərçivəsində keçiriləcək “Bayer Leverkuzen” - “Qarabağ” oyunu barədə danışarkən deyib.

Təcrübəli mütəxəssis qeyd edib ki, Ağdam klubu daha əvvəl də Avropanın aparıcı klublarına qarşı mübarizə aparıb: "İnter", "Çelsi", "Roma" kimi komandalara qarşı oynayıb. Amma bu cür futbol oynayan komanda ilə Ağdam təmsilçisi ilk dəfə qarşılaşacaq. Düşünürəm ki, "Qarabağ"ın onlarla oynamağa təcrübəsi çatır. Amma reallıq budur, Leverkuzen təmsilçisi "Qarabağ"dan 2 baş üstündür. Ağdam təmsilçisi taktikanın hesabına "Bayer Leverkuzen"in sürətini azalda bilər. Təmsilçimizin heyətində belə oyunçular var. Hər nə qədər rəqib güclü olsa da, “Qarabağ”dan uğurlu nəticə gözləyirik”.

Azad NURİYEV