Ehtiram Quliyev: “Mən “Turan Tovuz”un rəhbərindən öncə Azərbaycan vətəndaşıyam”

“Mənim “Qarabağ”la birgə səfərə yollanmağım sosial mediada müzakirəyə çevrilibsə, bu, xoş xəbərdir. Deməli, cəmiyyətimizdə futbola maraq artıb”.

Futbolxeber.az saytına eksklüziv açıqlamasında bu sözləri “Turan Tovuz”un İdarə Heyətinin sədri Ehtiram Quliyev deyib.

“Turan Tovuz”un rəhbəri dünən “Qarabağ”la birgə Almaniyaya yollanıb ki, bu, sosial şəbəkədə müzakirəyə çevrilib.

E.Quliyev qeyd edib ki, o, ilk növbədə Azərbaycan vətəndaşıdır: “Bu cür halların olması lazımdır ki, futbol Azərbaycanda daha da populyar idman növünə çevrilsin. Mən “Turan Tovuz” klubunun rəhbəri olmadan öncə Azərbaycan vətəndaşıyam. Azərbaycanın bir klubunun Avroliqanın qrup mərhələsində çıxış etməsi ölkəmizə reytinq xalları qazandırır. Avrokuboklarda hər zaman “Qarabağ”a azarkeşlik edirəm. Hər bir normal Azərbaycan vətəndaşı kimi. Bu, illərdir dəyişməyən bir ənənədir”.

O, Leverkuzen səfərində Ağdam klubundan gözəl oyun gözlədiyini vurğulayıb: “Qarabağ”ı səfərdə daha əvvəl də müşayiət etmişəm. Yəni bu, ilk belə hal deyil. Almaniyaya böyük ümidlərlə gəlmişik. “Qarabağ”dan çətin səfərdə yaxşı oyun gözləyirik. İnanıram ki, “Qarabağ” Azərbaycanın reytinq xallarını artıracaq”.

İbrahim CƏFƏROV