Qurban Qurbanov: “Demək olar ki, hamı oyuna hazırdır”

“Qarabağ”ın baş məşqçisi Qurban Qurbanov UEFA Avropa Liqası qrup mərhələsinin “Bayer Leverkuzen”lə matçından öncə “CBC Sport” kanalına müsahibə verib.

Futbolxeber.az saytının məlumatına görə, 51 yaşlı mütəxəssis öncə “Jean Borotra World Fair Play Career” mükafatını alması ilə bağlı təəsuratlarını bölüşüb: “Təəsüratlarım çox xoş oldu. Bəlkə də düşünmək olardı ki, yaddan çıxmışdı. Bu hadisə xeyli müddət əvvəl olmuşdu. Mükafatı alanda yenidən o olaylar yadıma düşdü. Maraqlı tədbir alındı. Həm mən özümə, həm həmin epizoda çox xoş münasibət göstərildi. Məni bu mükafata layiq gördükləri üçün hər kəsə təşəkkür edirəm”.

Qurban Qurbanov Tovuz səfərindən sonra futbolçularda yorğunluq olduğunu bildirib: “Heyətdə ümumi olaraq problem yoxdur. Sadəcə “Turan Tovuz” səfərindən sonra bir az üzgünlük və yorğunluq var idi. Süni örtük və uzaq səfərin təsiri hiss olunurdu. Futbolçular xeyli güc sərf etmişdilər. Amma “Bayer Leverkuzen”lə matç tam fərqli oyun, başqa bir turnirdir. Hər futbolçu meydanda olmaq istəyir. Demək olar ki, hamı hazırdır. Zədədən qayıdan bəzi futbolçular komanda ilə məşq etmələrinə baxmayaraq, fiziki durumları bizim istədiyimiz səviyyədə deyil”.

Qurbanov zədələrini sağaldan Bəhlul Mustafazadə və Marko Veşoviçin oynamağa hazır olduqlarını deyib: “Ümumən normaldırlar. Demək olar ki, zədələri tam olaraq geridə qalıb. Hazırlıq səviyyələri tam qaydasında deyil. Bəhlul bir aydan bir az çoxdur ki, məşqləri buraxırdı. Durumu pis deyil, komanda ilə tam məşqlərə başlayıb. İstənilən tapşırığı yerinə yetirə bilir. Sadəcə oyun ritmi tam çatışmır. Onlara bu gün və sabah məşqlərdə nəzər yetirəcəyik”.