“Turan Tovuz”dan etiraz bəyanatı

"Turan Tovuz” “Qarabağ”la dünən keçirilən Azərbaycan Premyer Liqasının oyununun hakimliyi ilə bağlı etiraz bəyanatı yayıb.

 

Futbolxeber.az saytının məlumatına görə, klub bununla bağlı açıqlama, eləcə də “Turan Tovuz”u narazı salan epizodların videosunu yayıb.

 

Bəyanatda bildirilib: “Turan Tovuz” PFK olaraq Premyer Liqada keçirdiyimiz ilk oyundan bugünədək heç vaxt hakimliklə bağlı haqlı və ya haqsız irad və etiraz bildirməmişik. Lakin mövsümün gedişində bir neçə dəfə bütün futbol ictimaiyyətinin də bizimlə həmfikir olduğu haqsızlıqlarla üzləşmişik. Verilməyən penalti, sayılmayan qol, futbolçularımıza verilən, lakin rəqiblərə göz yumulan vərəqələr gərgin keçən çempionatda qızıla bərabər olan xallarımızın itirilməsi ilə nəticələnir. Bu səhvlərin VAR sisteminin tətbiq edildiyi məqamda təkrarlanması bizi daha da narahat edir".

 

Qeyd olunub ki, klub gənc hakimlərin təyinatını hər zaman alqışlayıb və onların futbolumuzun inkişafında öz töhvələrini verəcəyinə inanıb: "Son oyunlarda əleyhimizə verilən ardıcıl qərarlar ilk dəfə hakimliklə bağlı etiraz etməyimizə səbəb olur. Belə səhvlərlə bir çox oyunda qarşılaşsaq da, sadəcə son oyundan videogörüntüləri təqdim edirik. Bütün rəqiblərə hörmətlə yanaşırıq hər hansı üstünlük, ayrıcalıq tələb etmirik, təmiz futbol, ədalətli qərarlar istəyirik!”

 

Xatırladaq ki, “Turan Tovuz” - “Qarabağ” oyunu 2:2 hesabı ilə yekunlaşıb. Oyunun baş hakimi Fərid Hacıyev, VAR hakimi Kamranbəy Rəhimov, AVAR hakimi Cavid Cəlilov olub.