Mutu: “Məni ən çox sevindirən...”

"Bizim üçün yaxşı oyun və nəticə oldu. Futbolçuların performansından razı qaldım. Onları təbrik edirəm"

Futbolxeber.az saytının məlumatına görə, bu sözləri "Neftçi"nin baş məşqçisi Adrian Mutu Azərbaycan Premyer Liqasının 10-cu turunda səfərdə "Səbail"i 4:2 hesabı ilə məğlub etdikləri matçdan sonra təşkil olunan mətbuat konfransında deyib.

Rumın mütəxəssis komandanın kapitanı Emin Mahmudovun cəzalı duruma düşməsi səbəbindən "Səbail"lə görüşü buraxması haqda da danışıb: “4 qol vurduq. Amma daha çox şanslarımız var idi. Eminin komandadakı rolunu çox yüksək qiymətləndirirəm. Bu gün Filip Ozobiç o mövqedə oynadı. Düşünürəm ki, heç də pis çıxış etmədi".

A.Mutu oyunda "Neftçi"nin hücumçularının fərqlənməməsi haqda deyib: "Rəhmanın qol vurmağına görə sevinirəm. Aaron Olanarenin oyununu da dəyərləndirərdim. Komanda üçün döyüşürdü. Oyundan-oyuna fiziki durumu yaxşılaşır. Şinyaşiki sonradan oyuna qoşulub qol ötürməsi etdi. Bu gün hücum oyunçuları öz işlərini gördülər".

O, "Hesab 2:2 olarkən narazı görünürdünüz. Hesabdan narazı idiniz, yoxsa futbolçuların performansından" sualını belə cavablandırıb: “Bəlkə də epizodik olaraq elə görmüsünüz. Narazı deyildim. İkinci hissədə mövqelərimizi tutmuşduq. Demək olar ki, rəqib qapımızda heç bir təhlükəli epizod yarada bilmədi. Məni ən çox sevindirən futbolçuların xarakter göstərərək geridönüş etməsidir".

O, "Ataa Caber Fələstin millisinin üzvüdür. Orada baş verənlər oyunçuya necə təsir edir" sualına cavab verməkdən imtina edib: "Bu haqda ümumiyyətlə danışmaq istəmirəm".

Mütəxəssis futbolçusu Höccət Haqverdinin sağ cinahda oynamasına da toxunub: "Xeyr, onu məcburiyyətdən sağ cinahda oynatmıram. Bilirdik ki, "Səbail" əks-hücumlarda çox təhlükəlidir. Buna görə də Höccəti orada oynatdım. Bu gün ondan hücum futbolu tələb etmirdim".