Rəşad Sadıqov: "Bizə qarşı belə epizodlarda qırmızı vərəqə olub"

"Çox emosional oyun oldu. Rəqib istəkli idi. İlk dəqiqələrdən hiss olunurdu. Oyundan qabaq futbolçularımızla rəqibi rəhlil etdikdə, "Neftçi" haqda danışdıqda onların böyük potesnailının olduğunu, əvvəlki turlardakı uğursuzluqlarını nəzərə almayıb, oyuna köklənməli olduğumuzu dedik".

Futbolxeber.az saytının məlumatına görə, bu sözləri "Zirə"nin baş məşqçisi Rəşad Sadıqov Azərbaycan Premyer Liqasının 7-ci turunda "Neftçi" ilə heç-heçə etdikləri oyundan (1:1) sonra keçirilən mətbuat konfransında deyib.

"Bu gün meydanda aqressiv, dinamik və nəticə qazanmaq üçün əlindən gələni edən "Neftçi" var idi. Futbolçularım əzmkar mübarizə apardılar, hücumlarımız, uzaqdan zərbələrimiz də oldu. Bəzi epizodlarda dəqiqlik çatmadı. Son dəqiqədə rəqibə qol imkanı verdik, Tyaqo Silva yaxşı çıxış etdi, Brkiç yaxşı seyvi ilə yadda qaldı. Maraqlı, gərgin oyunun şahidi olduq. "Neftçi" bu gün əvvəlki turlarla müqayisədə çox fərqli idi. Bu, bizə topla daha çox oynamağa mane olurdu. Amma əzmkarlıq edib, vacib bir xal qazandıq", - deyə o bildirib.

Mütəxəssis nəticədən razı qalıb-qalmadığı ilə bağlı sualı belə cavablandırıb: "Neftçi" ilə oynayırdıq. 6 oyunun 5-də qələbə qazananda, istər "Neftçi", istər digər komandalar motivasiyalı və diqqətli hazırlaşırlar. Hesabda geri düşmüşdük, amma bərabərləşdirdik. Azər Əliyev hücuma çox qoşulurdu. Penalti qazandıq. Bugünkü "Neftçi"ni nəzərə alsaq, 1:1 bizim üçün yaxşı nəticədir. İki xal itkisi saymıram, bir xal qazandıq".

"Zirə"nin baş məşqçisi "Neftçi"nin qapısına təyin olunan penalti epizoduna Adrian Mutunun narazı olması ilə əlaqədar söyləyib: "Mənə penalti kimi gəldi. Epizodu dinamik şəkildə görmədik. Matias oyunçumuzun ayağından basırdı. Bizə qarşı belə epizodlarda hətta qırmızı vərəqə də olub”.

R.Sadıqov komandada çox mövqenin güclənməli olduğunu vurğulayıb: "Paxtman zədələnir, əvəzinə İlkini buraxırıqsa, demək ki, seleksiyamızda ciddi sıxıntı var. Filip çox yaxşı çıxış etdi. Sadəcə onu əvəzləməyə adam yox idi. Tək sağ cinah yox, heyətin genişliyi ilə bağlı problemimiz var. Mütləq şəkildə heyətimiz genişlənməlidir. Summa isinmədə xoşuma gəlmədi. Köməkçilərimə dedim ki, oyunu yaxşı alınmayacaq, elə də oldu. Halbuki həftəboyu yaxşı məşq etdi. Amma oyuna özünü düzgün kökləməmişdi. Ümid edirəm ki, növbəti matçlarda toparlanıb, daha yaxşı performans göstərəcək”.

O, "Qarabağ"dan Qaspar Panaderonu transfer etmək istədikləri iddialarına belə münasibət bildirib: "Xeyr. Transfer pəncərəsi də bağlanıb, icarəyə kimisə götürə bilmərik. İstədiyimiz futbolçular var idi, hətta Baqamolski üçün də "Neftçi"yə müraciət etmişdik. Sadəcə onlar gec hücumçu aldılar. Bəlkə erkən olsaydı, onu götürərdik. Yenə də baxırıq. Bilmirəm bu vaxta yaxşı futbolçu qalar, ya qalmaz. Açıq-aşkar görünür ki, seleksiyamızı tamamlaya bilməmişik. Müəyyən keyfiyyətləri ilə futbolçularım bunu sığortalayıb, nəticəyə yansıdırlar. Çaılışacağıq ki, qışa qədər seleksiyanın problemləri nəticəyə təsir etməsin".

"Zirə"nin baş məşqçisi İssa Cibrilanı son anda niyə əvəzləmədiyinin səbəbini də izah edib: "Bəli, fikrimi son anda dəyişdim. İsmayıl göstərdi ki, ayağında ağrı var. Zədədən gəlmişdilər, amma 90 dəqiqə meydanda saxladıq. Bu, düz deyil, amma məcbur idik. İsmayılı dəyişdik, risk etmək istəmədik. Ona görə dəyişdik. İssanı buraxaraq, əks-hücumlarda effektli olmağa çalışdıq. Amma İsmayıl əvəzetmə istəyirdi deyə, onu dəyişdik".