Yaşar Seyidov: “Bu qələbənin dadı çox şirindi”

“Bu, uzun illərdən sonra gələn qələbədi. Ona görə də bu qələbənin dadı çox şirindi”.

Futbolxeber.az saytına müsahibəsində bu sözləri II Liqanın ikinci turunda “Lerik”i 4:1 hesabı ilə məğlub edən “Dinamo”nun prezidenti Yaşar Seyidov deyib.

Yenidən Azərbaycan futbolu səhnəsinə qayıdan “Dinamo” dünən mövsümdə ilk qələbəsini qazanıb. Klub rəhbəri qeyd edib ki, “Dinamo”nun sərgildəyi oyunu dünən stadiona toplaşanların hamısı bəyənib: “Komandamız qısa zamanda yığılıb. Çempionatdan öncə cəmi 2 həftə məşq edə bilmişik. Buna baxmayarasaq, “Lerik”lə matçda komanda çox gözəl futbol sərgilədi. Stadiona toplaşan azarkeşlər, mütəxəssislər, hər kəs komandanın çıxışını bəyəndi. Layiqli qələbə qazandığımızı bildirdilər. Zaman keçdikcə daha gözəl, məzmunlu oynamağa başlayacağıq. Qələbə münasibəti ilə “Dinamo”nu sevənləri tərbik edirəm”.

Y.Seyidov qeyd edib ki, növbəti çağırışdan etibarən həqiqi hərbi xidmət vaxtı çatan milli üzvlərinin komandaya qoşulması gözlənilir: “Həqiqi hərbi xidmət vaxtı çatan U-21, U-19 millimizin üzvləri, eləcə də digər perspektivli gənclərin “Dinamo”da çıxış etməsi nəzərdə tutulub. Bilirsiz ki, AFFA İcraiyyə Komitəsinin bununla bağlı müvafiq göstərişləri var. AFFA və Peşəkar Futbol Liqası ilə birlikdə biz bu işləri görməliyik. Düzdür, başlanğıcda bütün bu prosedurları tənzimləmək heç də asan deyil. Lakin əminəm ki, birgə fəaliyyətimizlə zamanla yoluna qoyulacaq. Proses yekunlaşandan sonra artıq çətinlik çəkməyəcəyik”.

Klub rəhbəri qeyd edib ki, hazırda “Dinamo”nun heyəti gənc və təcrübəlilərdən qurulub: “Artıq “Neftçi”nin və U-19 millimizin üzvləri, əsgərlik vaxtı çatan 2 futbolçu komandamıza qoşulub. Lakin komandanın əsasını “Bakı”nın sabiq yetirmələri, eləcə də İsgəndər Cavadov Bakı Fubtol Akademiyasının üzvləri təşkil edir”.  

Azərbaycan futbolunun ən təcrübəli simalarından biri olan Yaşar bəy “Dinamo”nun strukturu barədə də danışıb: “Tezliklə klubun Müşahidə Şurası yaradılacaq. Orada Daxili İşlər Nazirliyinin (DİN) nümayəndələri yer alacaq. Klubun İdarə Heyəti isə futbol adamlarından təşkil olunacaq”.